Fransiya poytaxti Parij shahrida bugun, 1-oktabr kuni bo‘lib o‘tayotgan mashinalarsiz va motosikllarsiz kunda poytaxt aholisiga velosipedlarda harakatlanish yoki piyoda yurish taklif qilinmoqda. Bu haqda “RIA Novosti” xabar berdi.
“2015 va 2016-yilda bo‘lib o‘tgan Mashinalarsiz kunlarning muvaffaqiyatidan so‘ng shahar mashinalarsiz hududni butun Parij bo‘ylab kengaytirib, tadbirni bu yil ham tashkillashtirdi”, — deyiladi poytaxt meriyasining xabarida.
Aholiga va “shaharni sevuvchilar”ga mahalliy vaqt bilan 11:00 dan 18:00 ga qadar shahar bo‘ylab piyoda yurish, velosipedda, g‘ildirakli konkilarda, samokatlarda harakatlanish taklif etilgan. Avtomobillar harakatiga cheklov Parijdagi aylanma yo‘l — Pereferik bulvariga taalluqli emas.
Shu bilan birga, avtomobillardan foydalanishga cheklov jamoat transporti, sayyohlik avtobuslari, taksi va favqulodda xizmatlarga taalluqli emas. Shuningdek, avtomobilida tegishli belgisi bo‘lgan nogironlar ham shaxsiy transport vositasida harakatlanishi mumkin.
“Parijda har yili taxminan 2,5 ming kishi nafas olayotgan havo sababli hayotdan ko‘z yumadi. Bu YTHlarda qurbon bo‘layotgan kishilar sonidan 60 marta ko‘p”, — deydi aksiya tashkilotchilaridan biri.
Izoh (0)