Xitoy Savdo vazirligi 2017-yilning 1-oktabridan Shimoliy Koreyaga neft mahsulotlarini eksport qilishga cheklovlar kiritilganini ma’lum qildi. Tegishli bayonot vazirlik saytiga joylashtirildi, deb xabar berdi “RBK”.
Shuningdek, 2017-yilning 11-dekabridan boshlab KXDRdan to‘qimachilik mahsulotlarini import qilishga to‘liq taqiq qo‘yiladi. Bundan tashqari, Xitoy 23-sentabrdan Shimoliy Koreyaga kondensator yog‘i va suyultirilgan tabiiy gazni yetkazib berishni to‘xtatadi. Bunday chora-tadbirlar Xitoy tomonidan BMT Xavfsizlik kengashining 2375-sonli rezolyutsiyasiga tegishli ravishda qo‘llanilmoqda.
BMT Xavfsizlik kengashi 11-sentabr kuni ballistik raketalarning navbatdagi o‘tkazilgan sinoviga javob tariqasida Shimoliy Koreyaga nisbatan yangi sanksiyalarni bir ovozdan qabul qilgandi.
Avgust oyining oxirlarida esa Xitoy KXDR fuqarolari va kompaniyalariga Xitoyda yangi biznes ochish yoki mavjudlarini kengaytirishni taqiqlab qo‘ygandi.
Izoh (0)