“Jizzax ovozi” gazetasida Sharof Rashidov tahsil olgan maktab haqida maqola chop etildi.
“Yurtimizda ilm dargohlari ko‘p. Ular orasida o‘zining tarixiy yo‘li bilan ajralib turadigan ziyo maskanlari ham bisyor. Ana shunday mo‘tabar dargohlardan biri ‘Jizzaxning to‘ng‘ich maktabi’, ‘Kichik dorilfunun’ deya e’tirof etiladigan 16-umumiy o‘rta ta’lim maktabidir, desak aslo mubolag‘a qilmaymiz”, — deyiladi maqolada.
Tarixdan ma’lumki, O‘rta Osiyo rus imperiyasi tomonidan bosib olingach, rus-tuzem maktablari faoliyati yo‘lga qo‘yilgan. 1876-yilda bunday ta’lim muassasalari soni oltitani tashkil etgan.
1883-yilda Jizzaxning Eski shahar qismida ham maktab ochiladi. O‘sha kezlarda ishlab turgan dastlabki sinfda 15 nafar o‘quvchi tahsil oladi. Oradan olti yil o‘tgach maktabdagi sinf xonalari oltitaga yetadi. Bu bino shaharda yagona oqlangan bino bo‘lgani uchun mahalliy aholi tomonidan “oq uy” deb atalgan. Maktabda mashg‘ulotlar rus tilida olib borilgan. Vaqt o‘tib bolalar uchun o‘zbek tilida saboq olish fursati yetdi.
O‘zbek xalqining asl farzandlari — Hamid Olimjon, Qodirjon Imomov, Shukur Sa’dulla, Nazir Safarov, Sarvar Azimov, Orifjon Ikromov, O‘ktam Oripov, Asil Rashidovlar turli yillarda ushbu maktabda oq-qorani tanishdi. Ularning orasida atoqli davlat va jamoat arbobi Sharof Rashidov ham borligi ko‘nglimizda faxr-iftixor tuyg‘ularini uyg‘otadi.
Samarqand va Toshkent shaharlarida mas’uliyatli lavozimlarni egallagan kezlarida ham Sharof Rashidov o‘zi o‘qigan, nihoyatda qadrdon maktabidan ko‘ngil uzolmadi. Benazir inson mehribon ustozlari, sobiq sinfdoshlari bilan uchrashish, xalq ta’limi, jumladan, maktab hayotidagi voqealardan xabardor bo‘lish uchun vaqt topa oldi. Sharq me’morchiligining o‘ziga xos an’analarini o‘zida aks ettirgan yangi maktab binosi loyihasi yaratilishiga, qurilish-montaj ishlarining belgilangan maddatda yakunlanishiga amaliy ko‘mak berdi. Bu ziyo maskani endilikda 10-umumiy o‘rta ta’lim maktabi sifatida keng jamoatchilikka yaxshi tanish.
“Biz Sharof Rashidov o‘qib voyaga yetgan maktabda ishlab kelayotganimiz bilan faxrlanamiz. Davlatimiz rahbarining “Atoqli davlat arbobi va yozuvchi Sharof Rashidov tavalludining 100 yilligini nishonlash to‘g‘risida”gi qarori bu tuyg‘ularning yanada yuksalishi uchun zamin yaratdi. Sababi, O‘zbekiston Respublikasining Birinchi Prezidenti Islom Karimov uqtirib ketganidek, ‘Tarixiy xotirasiz-kelajak yo‘q’. Bu da’vatni har bir o‘g‘il-qiz ongiga singdirish zarur. Toki yoshlarimiz ona-Vatanimiz tarixini, uning fidoyi farzandlari bosib o‘tgan yo‘lni o‘rgansin. Xotira-muqaddas, qadrlash-ehtirom ekanligini anglasin.
Shahar xalq ta’limi, madaniyat bo‘limlari, ma’naviyat va targ‘ibot markazi, xotin-qizlar qo‘mitasi, ‘Nuroniy’ jamg‘armasi, 'Mahalla' xayriya jamoat fondi, O‘zbekiston yoshlar ittifoqi mahalliy Kengashi, 'Barkamol avlod’ Bolalar markazi hamda jamoatchilik vakillari hamkorligida bo‘lib o‘tayotgan madaniy-ma’rifiy tadbirlarda maktabimiz vakillari faol ishtirok etmoqda’, — deydi maktabning bir guruh o‘qituvchilari.
Izoh (0)