Avvalroq, paxta terimiga jalb qilingan OTMlar o‘qituvchi va talabalari 22-sentabrdan dalalardan o‘qish va ish joylariga qaytayotgani haqida xabar berilgan edi.
“Gazeta.uz” ning hukumatdagi axborot manbasining xabar qilishicha, 21-sentabr kuni tunda bo‘lib o‘tgan selektor yig‘ilishida O‘zbekiston bosh vaziri Abdulla Aripov Vazirlar Mahkamasining 8-avgustdagi bayonnoma qarori ijrosini ta’minlashni talab qilgan.
Mazkur qarorda 2017-yil paxta hosilini terib olishda 18 yoshga to‘lmagan yoshlarni, shuningdek tashkilotlar, ta’lim va sog‘liqni saqlash muassasalarining mehnat faoliyatida bo‘lgan xodimlarini paxta terimi tadbirlariga majburiy tarzda jalb qilish qat’iy man etilishi aytib o‘tilgan.
Talabalar, o‘qituvchilar va tibbiyot xodimlarini zudlik bilan paxta dalalaridan olib chiqib ketish topshirilgan. Hududlar va davlat organlari rahbarlari yuklatilgan talablarni bajarmaganlik uchun ogohlantirilib, aks holda “tashkiliy choralar” ko‘rilishi mumkinligi ma’lum qilingan.
Nashr tahririyati yarim tundan buyon O‘zbekistonning hududlardagi OTMlari talabalaridan ko‘plab xabarlarni qabul qilib olgan. Ularda talabalarni uylariga qaytarib yuborilgani yoki bunga tayyorgarlik ko‘rilayotgani ma’lum qilingan.“Bizni kechasi uchda uyg‘otishdi va uyga ketishimizni aytishdi. Soat beshda biz Navoiyda edik, hozir esa darsdamiz”, — dedi Navoiy viloyatida paxta terayotgan OTMlardan birining talabasi nashr bilan suhbatda.
Shuningdek, Qashqadaryo viloyatidagi talabalar ham paxtadan qaytganini ma’lum qilgan.
“So‘nggi vaqtlarda muxbirlarimiz suhbatlashgan talabalar paxta terimiga ixtiyoriy ravishda chiqish to‘g‘risida arizalar yozib berishga majbur bo‘lganlarini aytgan edi. Ayrimlari paxta terishga chiqishdan bosh tortgan taqdirda, o‘qishdan chetlatilishi to‘g‘risida bosim bo‘lganini ham ma’lum qilgan”, — deyiladi xabarda.
Xabarida materialni tayyorlash vaqtida nashr vakili soliq inspeksiyasiga chaqirilib, kompaniyadan davlatga yordam berish maqsadida Jizzax viloyatiga paxta terimiga jo‘natish uchun uch nafar xodim taqdim etish so‘ralgani ham bayon etilgan.
“Qayd etish joizki, ushbu murojaat iltimos ko‘rinishida bo‘lib, majburlashdek ko‘rinmadi. Bizdagi ma’lumotlarga ko‘ra, mamlakat hududlarida har qanday vaziyatda dalalarga chiqishga tayyor turgan paxta terish mashinalari ‘start’da turibdi”,— deyiladi xabarda.
Fermer xo‘jaliklari paxta yig‘im-terimiga band bo‘lmagan aholi, jumladan “Fidoyi yoshlar otryadlari” vakillarini jalb qilishlari mumkin. “Fidoyi yoshlar otryadi”, bu — O‘zbekiston Yoshlar ittifoqi loyihasi bo‘lib, band bo‘lmagan yoshlarga turli mavsumiy ishlarda ishtirok etish orqali daromad olish imkoniyatini taqdim etadi.
Ta’kidlash joizki, Vazirlar Mahkamasining selektor yig‘ilishi O‘zbekiston Prezidenti Shavkat Mirziyoyevning Nyu-Yorkdan qaytgan kunida bo‘lib o‘tdi. 19-sentabr kuni Birlashgan Millatlar Tashkiloti Bosh Assambleyasining 72-sessiyasida nutq so‘zlagan davlat rahbari O‘zbekistonda bolalar mehnati va majburiy mehnatni bekor qilish bo‘yicha amaliy choralar ko‘rilganini ma’lum qilgan edi.
Nashr so‘rovida ishtirok etgan ekspertlar davlat rahbarining paxta yig‘im-terimida majburiy mehnatdan foydalanish amaliyotini bekor qilish to‘g‘risidagi irodali qarorini tarixiy hodisa deb atadi.
Izoh (0)