«Жиззах овози» газетасида Шароф Рашидов таҳсил олган мактаб ҳақида мақола чоп этилди.
«Юртимизда илм даргоҳлари кўп. Улар орасида ўзининг тарихий йўли билан ажралиб турадиган зиё масканлари ҳам бисёр. Ана шундай мўътабар даргоҳлардан бири ‘Жиззахнинг тўнғич мактаби’, ‘Кичик дорилфунун’ дея эътироф этиладиган 16-умумий ўрта таълим мактабидир, десак асло муболаға қилмаймиз», — дейилади мақолада.
Тарихдан маълумки, Ўрта Осиё рус империяси томонидан босиб олингач, рус-тузем мактаблари фаолияти йўлга қўйилган. 1876 йилда бундай таълим муассасалари сони олтитани ташкил этган.
1883 йилда Жиззахнинг Эски шаҳар қисмида ҳам мактаб очилади. Ўша кезларда ишлаб турган дастлабки синфда 15 нафар ўқувчи таҳсил олади. Орадан олти йил ўтгач мактабдаги синф хоналари олтитага етади. Бу бино шаҳарда ягона оқланган бино бўлгани учун маҳаллий аҳоли томонидан «оқ уй» деб аталган. Мактабда машғулотлар рус тилида олиб борилган. Вақт ўтиб болалар учун ўзбек тилида сабоқ олиш фурсати етди.
Ўзбек халқининг асл фарзандлари — Ҳамид Олимжон, Қодиржон Имомов, Шукур Саъдулла, Назир Сафаров, Сарвар Азимов, Орифжон Икромов, Ўктам Орипов, Асил Рашидовлар турли йилларда ушбу мактабда оқ-қорани танишди. Уларнинг орасида атоқли давлат ва жамоат арбоби Шароф Рашидов ҳам борлиги кўнглимизда фахр-ифтихор туйғуларини уйғотади.
Самарқанд ва Тошкент шаҳарларида масъулиятли лавозимларни эгаллаган кезларида ҳам Шароф Рашидов ўзи ўқиган, ниҳоятда қадрдон мактабидан кўнгил узолмади. Беназир инсон меҳрибон устозлари, собиқ синфдошлари билан учрашиш, халқ таълими, жумладан, мактаб ҳаётидаги воқеалардан хабардор бўлиш учун вақт топа олди. Шарқ меъморчилигининг ўзига хос анъаналарини ўзида акс эттирган янги мактаб биноси лойиҳаси яратилишига, қурилиш-монтаж ишларининг белгиланган маддатда якунланишига амалий кўмак берди. Бу зиё маскани эндиликда 10-умумий ўрта таълим мактаби сифатида кенг жамоатчиликка яхши таниш.
«Биз Шароф Рашидов ўқиб вояга етган мактабда ишлаб келаётганимиз билан фахрланамиз. Давлатимиз раҳбарининг «Атоқли давлат арбоби ва ёзувчи Шароф Рашидов таваллудининг 100 йиллигини нишонлаш тўғрисида»ги қарори бу туйғуларнинг янада юксалиши учун замин яратди. Сабаби, Ўзбекистон Республикасининг Биринчи Президенти Ислом Каримов уқтириб кетганидек, ‘Тарихий хотирасиз-келажак йўқ’. Бу даъватни ҳар бир ўғил-қиз онгига сингдириш зарур. Токи ёшларимиз она-Ватанимиз тарихини, унинг фидойи фарзандлари босиб ўтган йўлни ўргансин. Хотира-муқаддас, қадрлаш-эҳтиром эканлигини англасин.
Шаҳар халқ таълими, маданият бўлимлари, маънавият ва тарғибот маркази, хотин-қизлар қўмитаси, ‘Нуроний’ жамғармаси, 'Маҳалла' хайрия жамоат фонди, Ўзбекистон ёшлар иттифоқи маҳаллий Кенгаши, 'Баркамол авлод’ Болалар маркази ҳамда жамоатчилик вакиллари ҳамкорлигида бўлиб ўтаётган маданий-маърифий тадбирларда мактабимиз вакиллари фаол иштирок этмоқда’, — дейди мактабнинг бир гуруҳ ўқитувчилари.
Изоҳ (0)