O‘zbekiston Axborot texnologiyalari va kommunikatsiyalarini rivojlantirish vazirligida 4-sentabr kuni mamlakatdagi barcha mobil aloqa operatorlari va internet-provayderlari rahbarlari ishtirokida tarif siyosatini tartibga solish bo‘yicha birlamchi vazifalar muhokamasiga bag‘ishlangan uchrashuv bo‘lib o‘tdi.
Vazirlik axborot xizmati xabariga ko‘ra, uchrashuv O‘zbekiston Prezidenti Shavkat Mirziyoyev tomonidan 2-sentabr kuni “Valyuta siyosatini liberallashtirish bo‘yicha birinchi navbatdagi chora-tadbirlar to‘g‘risida”gi farmon imzolangani munosabati bilan tashkil etilgan.
Uchrashuvda telekommunikatsiya xizmatlarini so‘mli tarifga o‘tkazishda abonentlarga zarar yetmasligini ta’minlash, jumladan, abonentlarga ko‘rsatilayotgan xizmatlarga belgilangan bugungi narxlarni oshirmaslik masalasi ko‘tarildi.
Davlat rahbarining farmonida tovarlar, ish va xizmat uchun narxlar va tariflar, shuningdek, jamiyatlarning nizom jamg‘armasiga minimal talablar faqat milliy valyutada belgilanishi ko‘rsatilgan.Uchrashuvda qabul qilingan qarorga muvofiq, 5-sentabridan barcha telekommunikatsiya xizmatlari uchun tariflar milliy valyutada — so‘mda belgilanadi.
Mavzuga doir: O‘zbekiston mobil aloqa operatorlari 5-sentabrdan tariflarni so‘mda belgilaydi. Narxlar oshmaydi
Shuni hisobga olgan holda, milliy valyutaga asoslangan billing tizimi ishga tushguniga qadar tariflar istisno tariqasida Markaziy bank tomonidan 29-avgustda o‘rnatilgan 1 AQSh dollarining so‘mga nisbatan qiymati (4210,35 so‘m) bo‘yicha belgilanadi.Xabarda operatorlarning billing tizimlari so‘mga muvofiqlashtirilishi uchun qancha vaqt talab qilinishiga aniqlik kiritilmagan.Sodda qilib aytganda, milliy valyutada tariflarning oshishiga yo‘l qo‘yilmaydi.
Misol uchun, hozirgi vaqtda Markaziy bank kursi bo‘yicha 10 AQSh dollari evaziga ko‘rsatiladigan xizmat, AQSh dollari kursining o‘zgarishidan qat’i nazar, o‘tish davrida 42 ming so‘mdan oshirilmaydi.
Axborot texnologiyalari va kommunikatsiyalarini rivojlantirish vazirligi axborotidan
Izoh (0)