OAV: Buyuk Britaniya maxsus bo‘linmalari Afg‘onistonga qaytishga tayyorgarlik ko‘rmoqda

Buyuk Britaniya Maxsus havo xizmati (Special Air Service, SAS) Donald Tramp taklif etgan yangi strategiyani qo‘llab-quvvatlash uchun Afg‘onistonga qaytishga tayyor. Bu haqda mamlakat armiyasidagi manbalarga tayanib, The Sunday Times ma’lum qildi, deya xabar beradi “RBK”.

London hozircha AQShdan harbiy kontingentni ko‘paytirishga rasmiy so‘rov olgani yo‘q, biroq mahalliy vazirlarning bu amalga oshishiga ishonchi komil. Mamlakat bosh vaziri Tereza Mey Afg‘onistonda maxsus bo‘linma guruhi ko‘paytirilishini ma’qullashi kutilmoqda.

Maxsus bo‘linma Afg‘onistonda toliblar yetakchilari, IShID va “Al-Qoida” jangarilarini yo‘q qilishga e’tiborini qaratadi. Ularni qo‘llab-quvvatlash uchun uchuvchisiz uchish qurilmalari va jangovar samolyotlar ham yuboriladi.

Ma’lumot uchun, Afg‘onistonda ayni paytda britaniyalik 500 nafarga yaqin harbiy bo‘lib, ular asosan mahalliy zobitlarni o‘qitish bilan shug‘ullanadi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.