Navoiy viloyati bojxona boshqarmasida Karmana tumani ma’muriy ishlar bo‘yicha sudi bilan hamkorlikda sayyor sud tashkil etildi. Unda viloyat bojxonachilari tomonidan aniqlangan 19 ta bojxona qoidabuzarligi holati ko‘rib chiqildi. Bu haqda “Daryo”ga boshqarma axborot xizmati xabar bermoqda.
Sayyor sudda 2 ta pornografik mazmundagi materiallar olib kirish, 1 ta 2200 dollar miqdoridagi xorijiy valyutani olib o‘tish, 1 ta 24 dona qadimiy tangalarni noqonuniy olib chiqish holati hamda tovarlarni o‘z vaqtida bojxona tartibiga rasmiylashtirmaslik, noto‘g‘ri ma’lumotlar taqdim etish, shuningdek, bojxona yuk deklaratsiyasini noto‘g‘ri to‘ldirganlik uchun viloyat bojxona boshqarmasi tomonidan yuritilgan ma’muriy ishlar ko‘rib chiqildi va jazoning muqarrarligi ta’minlandi.
Xususan, bojxona rasmiylashtiruvi bo‘yicha mutaxassis X.Xalilovga nisbatan “Ma’muriy javobgarlik to‘g‘risida”gi Kodeksning “Tovarlarni deklaratsiyalamaslik yoki noto‘g‘ri deklaratsiyalash” qismi bo‘yicha yuritilgan ish materiali ko‘rildi. X.Xalilov ish hajmining ko‘pligi sababli xatolikka yo‘l qo‘ygani, kelgusida bunday holat takrorlamasligi, oilaviy sharoiti og‘irligini ma’lum qilib, suddan unga nisbatan ko‘riladigan chorani yengillashtirishni so‘radi. Bu turdagi huquqbuzarlikni birinchi marotaba sodir etayotganligini inobatga olib, sud tomonidan unga nisbatan eng kam oylik ish haqining bir barobari miqdorida jarima qo‘llash to‘g‘risida qaror chiqarildi.
— Bu kabi sayyor sud majlislari o‘tkazishdan ko‘zlangan maqsad aybdorga faqat jazo tayinlash emas, balki sodir etilgan jinoiy qilmishning kelib chiqish sabablarini tahlil qilish, fuqarolar o‘rtasida huquqiy targ‘ibotni kuchaytirish hamda jinoyat va huquqbuzarliklarning oldini olishda davlat va jamoat tashkilotlari bilan keng jamoatchilik hamkorligini yanada mustahkamlashdir, — deydi Karmana tumani ma’muriy ishlar bo‘yicha sudi sudyasi Jamshid Tilavov.
Izoh (0)