Навоий вилояти божхона бошқармасида Кармана тумани маъмурий ишлар бўйича суди билан ҳамкорликда сайёр суд ташкил этилди. Унда вилоят божхоначилари томонидан аниқланган 19 та божхона қоидабузарлиги ҳолати кўриб чиқилди. Бу ҳақда «Дарё»га бошқарма ахборот хизмати хабар бермоқда.
Сайёр судда 2 та порнографик мазмундаги материаллар олиб кириш, 1 та 2200 доллар миқдоридаги хорижий валютани олиб ўтиш, 1 та 24 дона қадимий тангаларни ноқонуний олиб чиқиш ҳолати ҳамда товарларни ўз вақтида божхона тартибига расмийлаштирмаслик, нотўғри маълумотлар тақдим этиш, шунингдек, божхона юк декларациясини нотўғри тўлдирганлик учун вилоят божхона бошқармаси томонидан юритилган маъмурий ишлар кўриб чиқилди ва жазонинг муқаррарлиги таъминланди.
Хусусан, божхона расмийлаштируви бўйича мутахассис Х.Халиловга нисбатан «Маъмурий жавобгарлик тўғрисида»ги Кодекснинг «Товарларни декларацияламаслик ёки нотўғри декларациялаш» қисми бўйича юритилган иш материали кўрилди. Х.Халилов иш ҳажмининг кўплиги сабабли хатоликка йўл қўйгани, келгусида бундай ҳолат такрорламаслиги, оилавий шароити оғирлигини маълум қилиб, суддан унга нисбатан кўриладиган чорани енгиллаштиришни сўради. Бу турдаги ҳуқуқбузарликни биринчи маротаба содир этаётганлигини инобатга олиб, суд томонидан унга нисбатан энг кам ойлик иш ҳақининг бир баробари миқдорида жарима қўллаш тўғрисида қарор чиқарилди.
— Бу каби сайёр суд мажлислари ўтказишдан кўзланган мақсад айбдорга фақат жазо тайинлаш эмас, балки содир этилган жиноий қилмишнинг келиб чиқиш сабабларини таҳлил қилиш, фуқаролар ўртасида ҳуқуқий тарғиботни кучайтириш ҳамда жиноят ва ҳуқуқбузарликларнинг олдини олишда давлат ва жамоат ташкилотлари билан кенг жамоатчилик ҳамкорлигини янада мустаҳкамлашдир, — дейди Кармана тумани маъмурий ишлар бўйича суди судьяси Жамшид Тилавов.
Изоҳ (0)