Xo‘ja Alambardor masjidi imom-xatibi noibi Husaynxon qori Yahyo Abdulmajidning o‘g‘li Ubay Yahyoyev Bolgariyaning Nesebr shahrida bo‘lib o‘tgan “Chegarasiz matematika–2017” nomli xalqaro olimpiadaning final bosqichida qatnashib g‘olib bo‘ldi. Bu haqda “Qaqnus media” nashriyoti direktori Mubashshir Ahmad Facebook’dagi sahifasida ma’lum qildi.
Ubay Husaynxon o‘g‘li 11 mamlakatdan kelgan 1200 nafar kuchli matematik orasida o‘z yosh bosqichi bo‘yicha birinchi o‘rinni egallab, oltin medalga sazovor bo‘lgan.
Toshkentdagi ‘Erudit’ xususiy maktabida tahsil olayotgan o‘n bir yoshli Ubay sakkiz yoshida Qur’oni karimni mukammal yodlagan hofizi Kalomulloh. Rus, ingliz va fransuz tillarini juda yaxshi biladi. Olimpiadada g‘olib bo‘lganidan xabardor bo‘lgach, Husaynxonga buni e’lon qilish kerak, dedim. U kishi kamtarinlik qilib rozi bo‘lmadilar. Bu xabar qolganlarga o‘rnak, ilm toliblariga turtki, din va dunyoni ajratadiganlarga saboq va ‘chalamulla’ deya kamsitayotganlarga javob bo‘lishini o‘ylab, otani ko‘ndirdim. Ubay Husaynxon o‘g‘li xalqaro matematika olimpiadasining oltin medali sohibi! Buxoriylarning zamonaviy avlodi mana shunday bo‘ladi!Mubashshir Ahmad, “Qaqnus-media” nashriyoti direktori
Izoh (0)