Rossiya prezidenti Vladimir Putin G20 sammiti yakunlari bo‘yicha o‘tkazilgan matbuot anjumanida “televizordagi Donald Tramp haqiqiysidan sezilarli farq qilishini” aytib o‘tdi. Bu haqda Meduza xabar bermoqda.
“U mutlaq teran, suhbatdoshini to‘laqonli to‘g‘ri tushunadi, yetarlicha tez tahlil qilib, qo‘yilgan masalalarga javob beradi”, — dedi Putin.
“Shuning uchun ham, nazarimda, agar biz munosabatlarimizni kechagi suhbatimiz qanday kechgan bo‘lsa, shunday qura olsak, bizga zarur bo‘lgan munosabatlar darajasining bir qismini bo‘lsa-da qayta tiklay olamiz, deb taxmin qilsa bo‘ladi”, — deya qo‘shimcha qildi Rossiya prezidenti.
G20 sammiti doirasida Putin va Trampning ilk o‘zaro uchrashuvi bo‘lib o‘tdi. Xabar berishlaricha, yopiq eshiklar ortida o‘tgan mazkur uchrashuvda Suriyadagi vaziyat, kiberjinoyatchilik, shuningdek, Rossiyaning AQShdagi saylovlarga aralashgani ehtimoli masalalari muhokama qilingan.
Izoh (0)