Namangan shahridagi “Objuvoz” mahallasida 3-sonli ichki ishlar bo‘limi ochildi. Bu haqda “Daryo”ga Namangan viloyat IIB matbuot xizmati xabar bermoqda.
Bo‘lim shahardagi 22 ta mahallaga xizmat ko‘rsatadi. Mazkur mahallalarda 130 mingga yaqin kishi istiqomat qiladi.
2-qavatli binodan 12 ta xizmat xonasi, majlislar zali, navbatchilik qismi, vaqtinchalik ushlab turish xonalari o‘rin oldi.
Bo‘limning ochilish marosimida O‘zbekiston Prezidenti Davlat maslahatchisi O. Murodov va Ichki ishlar vaziri general-mayor A. Azizov ishtirok etdi. Ular xodimlarga yaratilgan sharoitlar, zamonaviy axborot-kommunikatsiya texnologiyalari joriy etilganligi, fuqarolar uchun qulayliklar bilan tanishdi.
Ma’lumot uchun, Namangan viloyati hududida bugungacha 10 ta ichki ishlar bo‘lim va bo‘linmalari yangidan tashkil etildi. Viloyat markazida esa jami 3 ta bo‘lim faoliyat ko‘rsatishi ko‘zda tutilgan.
Izoh (0)