Хўжа Аламбардор масжиди имом-хатиби ноиби Ҳусайнхон қори Яҳё Абдулмажиднинг ўғли Убай Яҳёев Болгариянинг Несебр шаҳрида бўлиб ўтган «Чегарасиз математика–2017» номли халқаро олимпиаданинг финал босқичида қатнашиб ғолиб бўлди. Бу ҳақда «Қақнус медиа» нашриёти директори Мубашшир Аҳмад Facebook’даги саҳифасида маълум қилди.
Убай Ҳусайнхон ўғли 11 мамлакатдан келган 1200 нафар кучли математик орасида ўз ёш босқичи бўйича биринчи ўринни эгаллаб, олтин медалга сазовор бўлган.
Тошкентдаги ‘Эрудит’ хусусий мактабида таҳсил олаётган ўн бир ёшли Убай саккиз ёшида Қуръони каримни мукаммал ёдлаган ҳофизи Каломуллоҳ. Рус, инглиз ва француз тилларини жуда яхши билади. Олимпиадада ғолиб бўлганидан хабардор бўлгач, Ҳусайнхонга буни эълон қилиш керак, дедим. У киши камтаринлик қилиб рози бўлмадилар. Бу хабар қолганларга ўрнак, илм толибларига туртки, дин ва дунёни ажратадиганларга сабоқ ва ‘чаламулла’ дея камситаётганларга жавоб бўлишини ўйлаб, отани кўндирдим. Убай Ҳусайнхон ўғли халқаро математика олимпиадасининг олтин медали соҳиби! Бухорийларнинг замонавий авлоди мана шундай бўлади!Мубашшир Аҳмад, «Қақнус-медиа» нашриёти директори
Изоҳ (0)