Qirg‘iziston Markaziy saylov komissiyasiga prezidentlik lavozimi uchun kurashish istagini bildirib hujjatlar taqdim etganlar soni 11 kishiga yetdi. Bu haqda “TASS” xabar bermoqda.
“Ikki kishi — Temir Sariyev va Bakit Torobayev siyosiy partiyalar syezdlarida ilgari surildi. Qolgan 9 kishi nomzodini o‘zi qo‘ygan. Saylovda qatnashishga oxirgi talabnoma ‘Dunyo generallari tinchlik uchun’ xalqaro assotsiatsiyasi maslahatchisi Taalatbek Masadiqovdan kelib tushdi”, — ta’kidladi komissiya vakillari.
Nomzodini o‘zi ilgari surganlar orasida hozirda korrupsiyada ayblanib, hibsda saqlanayotgan parlamentdagi “Otamakon” fraksiyasi yetakchisi Omurbek Tekebayev ham bor.
Oldinroq mamlakatning sobiq bosh vaziri va “Respublika” partiyasi rahbari Omurbek Babanov ham saylovlarda ishtirok istagini bildirgandi.
Prezident tarafdorlarining Qirg‘iziston Sotsial-demokratik partiyasi siyosiy kengashi amaldagi hukumat rahbari Sooronbay Jeenbekov nomzodini ilgari surishga qaror qildi. Partiya syezdi 15-iyulda bo‘lib o‘tadi.
Izoh (0)