New York Post Трамп ҳақида учта сўздан иборат мақола чоп этди

Американинг New York Post газетаси АҚШ президенти Дональд Трампга бағишланган учта сўздан иборат мақолани чоп этди, деб хабар берди «ТАСС».

«Трампнинг твитлари» сарлавҳаси остида чиққан мақола нашр таҳририятининг фикри акс эттирилувчи материаллар ўрин оладиган бўлимда чоп этилган. Унда «Тўхта. Шунчаки тўхта» дея ёзилган.

New York Post мақоланинг электрон версияси жойлаштирилган ўзининг сайтида, Трамп ўзини танқид қилган MSNBC телеканалининг икки нафар бошловчисини ҳақорат қилган твитъига ҳавола бериб кетган.

29 июнь, пайшанба куни Трамп ўзининг Twitter’даги саҳифасида MSNBC телеканалининг янгиликлар дастури бошловчилари Мика Бжезински ва Жо Скарборони қўпол ҳақорат қилган. Президент улардан бирини «телба», иккинчисини «савдойи» дея атаган.

Шундан сўнг Трамп ОАВ ва Республикачилар партияси вакилларининг танқидлари остида қолиб кетди. MSNBC телекомпанияси Трампнинг сўзларини қоралаб баёнот берди. Оқ уй вакили Сара Хакаби-Сандерс ўз навбатида президент ҳимоясига чиқиш қилиб, у «зарбага қарши зарба билан жавоб бермоқда» ва президентни танқид қилаётган «либерал ОАВ ўзини қўрқитишига йўл қўймайди» деди.

Трамп инаугурациядан кейин президентнинг Twitter’даги расмий аккаунтини ишлатишни бошлаган, бироқ ўзининг шахсий саҳифасида ҳам хабарлар ёзишни давом эттириб келаётганди. Аввалроқ, Трамп «Ўз фикрларимни ижтимоий тармоқлар ёрдамида жамиятга етказиш имконияти бўлмаганида, ҳеч қачон АҚШ президенти лавозимида ўтирмаган бўлар эдим», дея маълум қилганди.