Оқ уй аппаратининг 377 нафар ходими, шунингдек, АҚШ президенти Дональд Трампнинг маслаҳатчилари ва ёрдамчиларининг маошлари амалдаги маъмуриятнинг АҚШ Конгрессига юборган очиқ ҳисоботида эълон қилинди. Амалдорларнинг йиллик иш ҳақи 30 мингдан 179 минг долларгачани ташкил этади, деб хабар берди «ТАСС».
Ҳисоботда АҚШ президентининг куёви ҳамда юқори сиёсий маслаҳатчиси Жаред Кушнер, шунингдек, АҚШ президентининг маслаҳатчиси вазифасини бажарувчи қизи Иванка Трамп маош олмаслиги ҳақидаги маълумотлар тасдиқланган. Ҳужжатда уларнинг давлат ғазнасидан оладиган даромади нолга тенг деб кўрсатилган.
Оқ уйнинг асосий вакиллари — ходимлар аппаратининг раҳбари Райнс Прибес, Оқ уйнинг расмий вакили Шон Спайсер, бош сиёсий стратеги Стив Беннон ҳамда бош маслаҳатчи Келлиэнн Конуэйларнинг маоши йилига 179,7 минг долларни ташкил этади. Оқ уй матбуот котибининг ўринбосари Сара Сандерс 165 минг доллардан сал камроқ маош олади. Энг катта маошни президентнинг сиёсий бош маслаҳатчиси Марк Хаус олади — 187 минг доллар.
Оқ уйдаги 377 нафар ходимлар орасида энг кам маош оладиган одам — бу Оқ уй қошидаги миллий иқтисодий кенгаш раҳбари Гэри Кон. Унинг маоши 30 минг долларни ташкил этади.
Изоҳ (0)