Qirg‘izistonning Chuy viloyati, “Qayindi-temiryo‘l” nazorat-o‘tkazish punktida davlat chegarasidan o‘tish qoidalarini buzgani uchun O‘zbekiston fuqarosi qo‘lga olindi. Bu haqda Qirg‘iziston chegara xizmati ma’lum qildi, deya xabar beradi K-News.
Bishkek—Moskva yo‘nalishidagi temiryo‘l reysini rasmiylashtirish davomida chegarachilar 1985-yilda tug‘ilgan O‘zbekiston fuqarosi pasportida Qirg‘izistonga kirish qaydi-muhri yo‘qligini aniqladi. Shuningdek, surishtiruvlar chog‘ida unda reysga chipta ham yo‘qligi ma’lum bo‘ldi.
Qo‘lga olingan fuqaroning bildirishicha, sud majburiyatlarini bajarmaganligi sababli O‘zbekistondan chiqishi man etilgani uchun u Qirg‘iziston chegarasini ruxsat berilmagan joyda kesib o‘tgan.
Tegishli hujjatlar rasmiylashtirilgandan so‘ng huquqbuzar Qirg‘iziston milliy xavfsizlik qo‘mitasi hududiy bo‘limi xodimlariga topshirildi.