28-iyun kuni Axborot texnologiyalari va kommunikatsiyani rivojlantirish vazirligida Vebster universitetining (AQSh) akademik ishlar, xalqaro ilm dargohlari va tashabbuslari bo‘yicha vitse-prezidenti Piter Maxer bilan uchrashuv bo‘lib o‘tdi, deb xabar berdi UzDaily.

Uchrashuv davomida Vebster universiteti va axborot texnologiyalari sohasida kadrlarni tayyorlash bo‘yicha Toshkent axborot texnologiyalari universitetining hamkorlik istiqbollari muhokama qilindi. Xususan, hamkorlik davomida talabalar uchun yangi akademik dasturlarni joriy qilish, Vebster universitetining xalqaro kampuslari orqali o‘qituvchilar va talabalarni almashish, birgalikda ilmiy tadqiqotlarni o‘tkazish yo‘nalishlari bo‘yicha o‘zaro qiziqishlar bildirib o‘tildi.

Vebster universiteti bilan hamkorlikning kengaytirilishi Axborot-kommunikatsiya sohasida xalqaro standartlarga javob beradigan malakali mutaxassislarni tayyorlashda xizmat qilishi alohida ta’kidlab o‘tildi.

Vebster universiteti 1915-yilda tashkil topgan bo‘lib, Missuri shtatining Sent-Luis shahrida joylashgan. Vebster xususiy notijorat universitet bo‘lib, uning AQShdagi, shuningdek, Yevropa, Osiyo va Afrikadagi oliygohlarida 17 mingga yaqin talaba tahsil oladi.