Joriy yilning 28-iyun kuni Vazirlar Mahkamasi qoshidagi Din ishlari bo‘yicha qo‘mitada “Iyegova guvohlari” diniy tashkiloti delegatsiyasi — AQShdagi boshqaruv Kengashi vakili Kennet Flodin va Yevropa birlashmasi vakili Lorenso Trapanezelar bilan uchrashuv bo‘lib o‘tdi, deb xabar berdi qo‘mitaning matbuot xizmati.
Uchrashuvni Din ishlari bo‘yicha qo‘mita raisi o‘rinbosari O‘tkir Hasanboyev olib bordi. Shuningdek, uchrashuvda qo‘mita konsultanti B.Qodirov va Chirchiq shahridagi “Iyegova guvohlari” diniy tashkiloti vakili N.Korolevlar ishtirok etdi.
O‘zaro tanishuvdan so‘ng delegatsiya a’zolari O‘zbekistondagi diniy vaziyat va qo‘mita faoliyati bilan tanishtirildi. Jumladan, O‘zbekistonda diniy erkinliklarning milliy qonunchilik, xususan, Konstitutsiyaning tegishli moddalari va O‘zbekiston Respublikasining “Vijdon erkinligi va diniy tashkilotlar to‘g‘risida”gi qonuni bilan mustahkamlangani alohida tilga olindi.
Uchrashuv davomida Kennet Flodin tashkil etilgan uchrashuv va berilgan ma’lumotlar uchun o‘z minnatdorchiligini bildirdi. Shuningdek, o‘z tashrifining asosiy sababi — tashkilot faoliyatiga oid masalalar muhokamasi ekanini aytib o‘tdi.
O‘tkazilgan suhbat nihoyasida delegatsiya a’zolari qabuldan mamnun ekanliklarini izhor etib, tomonlar kelgusida ham bu kabi muloqotni davom ettirish maqsadga muvofiqligini bildirdilar.
Izoh (0)