O‘zbekiston Prezidenti qarori bilan tasdiqlangan dasturga muvofiq, Samarqand viloyatida 2017—2018-yillarda 553 nafar profilaktika inspektori xizmat uyi bilan ta’minlanishi rejalashtirilgan. Bu haqda O‘zA xabar bermoqda.
Samarqand viloyati IIB huquqbuzarliklar profilaktikasi boshqarmasi boshlig‘i, podpolkovnik R.Rahimovga ko‘ra, joriy yilda profilaktika inspektorlari uchun 123 uy-joy qurish va 82 kvartira ajratish, 2018-yilda 340 uy-joy qurish va 82 kvartira berish ko‘zda tutilgan. Ayni paytda 123 xizmat uy-joyi tegishli dastur asosida qurilmoqda. Bo‘sh turgan 62 binoda ta’mirlash ishlari olib borilyapti. Hozirgacha 20 profilaktika inspektori har tomonlama zamonaviy va qulay xizmat uylari bilan ta’minlandi.
Samarqand shahar IIB profilaktika katta inspektori Sharif Muhammadiyev Registon, Eski Qalandarxona, Qo‘shhovuz, Dahbediy va Ko‘kmasjid mahallalari hududida xizmat faoliyatini olib boradi. Shaharda uy-joyi bo‘lmagani uchun Sharif shu paytgacha Samarqand tumanidan qatnab ishlashga majbur edi.
Yaqinda u bu tashvishdan qutildi. Ko‘kmasjid mahallasi hududida unga uch xonali shinam xizmat uyi qurib berildi.
— Avvallari shoshilinch vaziyatda hududga yetib kelishim uchun ancha vaqt yo‘qotishimga to‘g‘ri kelardi, — deydi Sh.Muhammadiyev. — Tabiiyki, bu ish samaradorligiga ham salbiy ta’sir ko‘rsatardi. Endi esa mahalla hududidagi uyda yashay boshlagach, vaqtim tejaldi, tun-kun odamlar orasidaman. Oila a’zolarimni ham yaxshi qabul qilishdi. Har bir xonadon, mahalla, muassasada hayot tarzini yaqindan o‘rganib, faollar bilan hamkorlikda ishlayapman.
Izoh (0)