Samarqand viloyati perinatal markazida tibbiy kislorod ishlab chiqarish generatori kichik zavodi hamda endoginekologiya o‘quv markazi foydalanishga topshirildi. Bu haqda O‘zA xabar berdi.
Sog‘liqni saqlash vazirligi va Germaniya xalqaro hamkorlik tashkiloti tomonidan Belgiyadan 90 ming yevroga keltirilgan tibbiy kislorod ishlab chiqarish generatori Markaziy Osiyoda yagona mini korxona hisoblanadi. Generator nafaqat markaz, balki viloyatdagi boshqa tug‘ruq majmualarining tibbiy kislorodga bo‘lgan ehtiyojini qondiradi, ushbu maqsad uchun sarflanadigan mablag‘ tejalishiga imkoniyat beradi. Perinatal markazdagi bemorlarga bir yilda tibbiy kislorod uchun o‘rtacha 160 million so‘m ajratilar edi.
Tibbiyot muassasasida Samarqand davlat tibbiyot institutining vrachlar malakasini oshirish fakulteti bazasida tashkil etilgan endoginekologiya o‘quv markazi viloyat shifokorlarining endovizual ginekologiya sohasidagi malakalarini oshirishga xizmat qiladi. Bu yerda ayni paytda Sog‘liqni saqlash vazirligi, Germaniya xalqaro hamkorlik tashkilotining “Yuqori texnologik tibbiy asbob-uskunalardan foydalanish bo‘yicha tibbiy va texnik xodimlar malakasini oshirish” loyihasi hamda “Karl storz”, “Jonson&Jonson” kabi xalqaro tashkilotlar hamkorligida “Operativ ginekologiyada laparoskopiya va gisteroskopiya” mavzusida mahorat darslari o‘tkazilmoqda.
Izoh (0)