Bekobod tumanida yashovchi Mastura Shahobiddinova Bekobod tumani “Yangi hayot” fermerlar uyushmasida yashovchi 1994-yilda tug‘ilgan Nilufar Baxtiyorovaning ishonchiga kirib, 2017-yil 9-fevral taxminan soat 17:00 da u ishlaydigan Bekobod tumani Zafar shaharchasida joylashgan “Zumrad” nomli go‘zallik saloniga kelgan va Nilufarga tegishli bo‘lgan 16 gramm tilla taqinchoqlarini 3—4 kun ichida sotib berishni va’da qilgan. Mastura Shahobiddinova taqinchoqlarning har bir grammini 180 ming so‘mdan jami 2 mln 880 ming so‘mga sotib berishni oldindan va’da qilib, ushbu tilla taqinchoqlarni firibgarlik yo‘li bilan qo‘lga kiritgan va tilla taqinchoqlarni sotish evaziga kelgan pullarni o‘zining ehtiyojlari uchun ishlatib yuborgan. Bu haqda Toshkent viloyati IIB xabar berdi.
Bundan tashqari, fuqarolarning pul mablag‘lari bo‘lgan plastik kartalarini naqd qilib berishni oldindan va’da qilgan va buning evaziga 10 foizini o‘ziga olib qolishni aytgan. Shu tariqa, 1964-yilda tug‘ilgan Bahodir Oltmishovning hisobida 3 mln 770 ming so‘m, 1985-yilda tug‘ilgan Shodmon Shodiyevning hisobida 6 mln 700 ming so‘m, 1949-yilda tug‘ilgan Sherali Qoriyevning hisobida yetti million so‘m miqdoridagi pul mablag‘lari bo‘lgan plastik kartalarini firibgarlik yo‘li bilan qo‘lga kiritib, plastik kartalarning hisobida bo‘lgan pul mablag‘larini o‘zining ehtiyojlari uchun ishlatib yuborgan.
Shunday qilib, fuqaro Mastura Shahobiddinova jami 20 mln 350 ming so‘m miqdordagi pullarni aldash, o‘zgalarning ishonchni suiiste’mol qilish yo‘li bilan o‘zlashtirishga erishgan.
Olib borilgan tezkor chora-tadbirlar natijasida bu firibgarliklarga chek qo‘yildi. Endilikda Mastura Shahobiddinova sodir etgan xatti-harakatlari uchun qonun oldida javob beradi.
Izoh (0)