Ўзбекистон Президенти қарори билан тасдиқланган дастурга мувофиқ, Самарқанд вилоятида 2017—2018 йилларда 553 нафар профилактика инспектори хизмат уйи билан таъминланиши режалаштирилган. Бу ҳақда ЎзА хабар бермоқда.
Самарқанд вилояти ИИБ ҳуқуқбузарликлар профилактикаси бошқармаси бошлиғи, подполковник Р.Раҳимовга кўра, жорий йилда профилактика инспекторлари учун 123 уй-жой қуриш ва 82 квартира ажратиш, 2018 йилда 340 уй-жой қуриш ва 82 квартира бериш кўзда тутилган. Айни пайтда 123 хизмат уй-жойи тегишли дастур асосида қурилмоқда. Бўш турган 62 бинода таъмирлаш ишлари олиб бориляпти. Ҳозиргача 20 профилактика инспектори ҳар томонлама замонавий ва қулай хизмат уйлари билан таъминланди.
Самарқанд шаҳар ИИБ профилактика катта инспектори Шариф Муҳаммадиев Регистон, Эски Қаландархона, Қўшҳовуз, Даҳбедий ва Кўкмасжид маҳаллалари ҳудудида хизмат фаолиятини олиб боради. Шаҳарда уй-жойи бўлмагани учун Шариф шу пайтгача Самарқанд туманидан қатнаб ишлашга мажбур эди.
Яқинда у бу ташвишдан қутилди. Кўкмасжид маҳалласи ҳудудида унга уч хонали шинам хизмат уйи қуриб берилди.
— Авваллари шошилинч вазиятда ҳудудга етиб келишим учун анча вақт йўқотишимга тўғри келарди, — дейди Ш.Муҳаммадиев. — Табиийки, бу иш самарадорлигига ҳам салбий таъсир кўрсатарди. Энди эса маҳалла ҳудудидаги уйда яшай бошлагач, вақтим тежалди, тун-кун одамлар орасидаман. Оила аъзоларимни ҳам яхши қабул қилишди. Ҳар бир хонадон, маҳалла, муассасада ҳаёт тарзини яқиндан ўрганиб, фаоллар билан ҳамкорликда ишлаяпман.
Изоҳ (0)