Toshkent shahar IIBBda 15-iyunda bo‘lib o‘tgan brifingda ma’lum qilinishicha, boshqarmaning navbatchilik qismiga quyidagi mazmunda xabar kelib tushgan:
Ikki nafar noma’lum shaxs Mirobod tumani Chimkent ko‘chasi 1-uy 27-xonadonning eshigini kalit tanlash yo‘li bilan g‘ayriqonuniy ravishda ochib kirgan. Jinoyatchilar xonadon egasi Abdujabbor Malikovga tegishli umumiy qiymati 7500 AQSh dollariga teng turli xildagi qimmatbaho tilla taqinchoqlar, bahosi 50 AQSh dollariga teng kumush tangalar, 2600 AQSh dollari hamda 2 million 500 ming so‘m miqdoridagi naqd pulni qo‘lga kiritgan. Ular voqea joyidan yashirinmoqchi bo‘lgan vaqtda Malikovning farzandi 1994-yilda tug‘ilgan Jasur Malikov kelib qolgan. Noma’lum shaxslar Jasur Malikovga hujum qilib, tan jarohati yetkazgan va voqea joyidan yashiringan.
Holat yuzasidan Mirobod tuman IIB huzuridagi Tergov bo‘limi tomonidan noma’lum shaxslarga nisbatan O‘zbekiston Respublikasi Jinoyat Kodeksining 164-moddasi 3-qismi “b” bandi, ya’ni bosqinchilik alomatlari bilan jinoyat ishi qo‘zg‘atilgan.
Dastlabki tergov harakatlari davomida Jasur Malikov ikki shaxsdan birining fotorobotini tuzib bergan. Fotorobot tuzilganidan keyin Toshkent shahar IIBB barcha tuzilmalari fotoroboti yaratilgan fuqaroni qidirib topishga jalb etilgan.
Biroq olib borilgan dastlabki tergov harakatlari davomida xonadon egasining o‘g‘li Jasur Malikov mol-mulkni o‘z ehtiyoji uchun ishlatib, o‘z qilmishini yashirish maqsadida tanishi Dmitriy Kalyujniy bilan o‘zaro til biriktirib, bosqinchilik jinoyatini sahnalashtirgani aniqlandi, Kalyujniy Malikovning o‘ng yelkasiga o‘tkir tig‘li jism bilan millatchilar belgisini chizib, mol-mulk bilan uydan chiqib ketgan.
O‘tkazilgan tintuv davomida Kalyujniyning uyidan barcha mol-mulk ashyoviy dalil sifatida olingan. Hozirgi vaqtda Jinoyat Kodeksining 169-moddasiga asosan o‘g‘rilik jinoyati bo‘yicha dastlabki tergov harakatlari olib borilmoqda.
Izoh (0)