Тошкент шаҳар ИИББда 15 июнда бўлиб ўтган брифингда маълум қилинишича, бошқарманинг навбатчилик қисмига қуйидаги мазмунда хабар келиб тушган:
Икки нафар номаълум шахс Миробод тумани Чимкент кўчаси 1-уй 27-хонадоннинг эшигини калит танлаш йўли билан ғайриқонуний равишда очиб кирган. Жиноятчилар хонадон эгаси Абдужаббор Маликовга тегишли умумий қиймати 7500 АҚШ долларига тенг турли хилдаги қимматбаҳо тилла тақинчоқлар, баҳоси 50 АҚШ долларига тенг кумуш тангалар, 2600 АҚШ доллари ҳамда 2 миллион 500 минг сўм миқдоридаги нақд пулни қўлга киритган. Улар воқеа жойидан яширинмоқчи бўлган вақтда Маликовнинг фарзанди 1994 йилда туғилган Жасур Маликов келиб қолган. Номаълум шахслар Жасур Маликовга ҳужум қилиб, тан жароҳати етказган ва воқеа жойидан яширинган.
Ҳолат юзасидан Миробод туман ИИБ ҳузуридаги Тергов бўлими томонидан номаълум шахсларга нисбатан Ўзбекистон Республикаси Жиноят Кодексининг 164-моддаси 3-қисми «б» банди, яъни босқинчилик аломатлари билан жиноят иши қўзғатилган.
Дастлабки тергов ҳаракатлари давомида Жасур Маликов икки шахсдан бирининг фотороботини тузиб берган. Фоторобот тузилганидан кейин Тошкент шаҳар ИИББ барча тузилмалари фотороботи яратилган фуқарони қидириб топишга жалб этилган.
Бироқ олиб борилган дастлабки тергов ҳаракатлари давомида хонадон эгасининг ўғли Жасур Маликов мол-мулкни ўз эҳтиёжи учун ишлатиб, ўз қилмишини яшириш мақсадида таниши Дмитрий Калюжний билан ўзаро тил бириктириб, босқинчилик жиноятини саҳналаштиргани аниқланди, Калюжний Маликовнинг ўнг елкасига ўткир тиғли жисм билан миллатчилар белгисини чизиб, мол-мулк билан уйдан чиқиб кетган.
Ўтказилган тинтув давомида Калюжнийнинг уйидан барча мол-мулк ашёвий далил сифатида олинган. Ҳозирги вақтда Жиноят Кодексининг 169-моддасига асосан ўғрилик жинояти бўйича дастлабки тергов ҳаракатлари олиб борилмоқда.
Изоҳ (0)