Namanganda firibgarlik bilan bog‘liq qator jinoyatlar fosh etilmoqda. Ularning ayrimlari haqida “Daryo”ga viloyat IIB matbuot xizmati ma’lum qildi.
Namangan shahrida yashovchi D.Nodira ariza bilan murojaat qilib, 2016-yil iyul oyida tanishi N.Tohirjon yer uchastkasi olib berishini aytib, 2 ming dollar pulini olgani, biroq hozirgi kunga qadar na uchastka, na pulni bermay kelayotganligini ma’lum qilib, chora ko‘rishni so‘ragan.
Uychi tumanida yashovchi N.Asqarbek tanishi N.Madinaning ishonchiga kirib, “Jiyaningizni tuman tibbiyot birlashmasiga hamshira sifatida ishga joylab qo‘yaman” deb, 300 dollar olganligi aniqlandi.
Namangan shahrida yashovchi, 1954-yilda tug‘ilgan M.No‘mon tanishi N.Orifjonni huquqni muhofaza qilish idoralariga ishga joylab qo‘yishiga ishontirib, 1800 dollar pulini oladi va o‘z ehtiyojlari uchun ishlatib yuboradi.
“To‘raqo‘rg‘on tumangaz” nazoratchisi B.Akramjon To‘raqo‘rg‘on shahrida yashovchi ikki fuqaroning tabiiy gazdan bo‘lgan qarzdorliklarini yo‘qotib berish va dalolatnoma rasmiylashtirmaslik evaziga ulardan 710 ming so‘mni firibgarlik yo‘li bilan qo‘lga kiritganligi aniqlandi.
Yuqoridagi barcha holatlar yuzasidan JKning tegishli moddalari bilan jinoyat ishlari qo‘zg‘atildi.
Izoh (0)