Наманганда ҳуқуқ-тартибот идораларига ишга жойлашни ваъда қилган фирибгар қўлга олинди

Наманганда фирибгарлик билан боғлиқ қатор жиноятлар фош этилмоқда. Уларнинг айримлари ҳақида «Дарё»га вилоят ИИБ матбуот хизмати маълум қилди.

Наманган шаҳрида яшовчи Д.Нодира ариза билан мурожаат қилиб, 2016 йил июль ойида таниши Н.Тоҳиржон ер участкаси олиб беришини айтиб, 2 минг доллар пулини олгани, бироқ ҳозирги кунга қадар на участка, на пулни бермай келаётганлигини маълум қилиб, чора кўришни сўраган.

Уйчи туманида яшовчи Н.Асқарбек таниши Н.Мадинанинг ишончига кириб, «Жиянингизни туман тиббиёт бирлашмасига ҳамшира сифатида ишга жойлаб қўяман» деб, 300 доллар олганлиги аниқланди.

Наманган шаҳрида яшовчи, 1954 йилда туғилган М.Нўъмон таниши Н.Орифжонни ҳуқуқни муҳофаза қилиш идораларига ишга жойлаб қўйишига ишонтириб, 1800 доллар пулини олади ва ўз эҳтиёжлари учун ишлатиб юборади.

«Тўрақўрғон тумангаз» назоратчиси Б.Акрамжон Тўрақўрғон шаҳрида яшовчи икки фуқаронинг табиий газдан бўлган қарздорликларини йўқотиб бериш ва далолатнома расмийлаштирмаслик эвазига улардан 710 минг сўмни фирибгарлик йўли билан қўлга киритганлиги аниқланди.

Юқоридаги барча ҳолатлар юзасидан ЖКнинг тегишли моддалари билан жиноят ишлари қўзғатилди.