Toshkent shahrida 50 ta otdan iborat otliq otryad 2017-yilning yakunigacha o‘z faoliyatini boshlaydi. Otliq otryad bazasi Chilonzor buyum bozori yaqinida joylashadi. Bu haqda Toshkent shahar IIBBda 8-iyunda bo‘lib o‘tgan brifingda Patrul-post xizmati brigada komandiri o‘rinbosari Murodullo Aliqoriyev ma’lum qildi.
O‘zbekistonda otliq otryadlari 2014-yilda Andijon va Namangan viloyatlarida tuzilgan. Namangan viloyati IIBdagi otliq otryad 22 nafar xodim va 22 bosh xizmat otidan tashkil topgan.
Toshkentda tashkil etiladigan otliq otryadi quyidagi vazifalarni bajaradi:
- patrul marshrutlarida va tegishli hududlarda jamoat tartibi va xavfsizligiga qarshi qaratilgan harakatlarni o‘z vaqtida aniqlash, oldini olish va bartaraf etish, shuningdek, huquqbuzarlikni sodir etgan shaxslarni qo‘lga olish bo‘yicha choralar ko‘rish;
- ochiq maydonlarda sport, madaniy-tomosha va boshqa ommaviy tadbirlarni o‘tkazish chog‘ida mobil to‘siqlar va otryadlarni tashkil qilish;
- ochiq joylarda o‘tkaziladigan ommaviy tadbirlarda xizmat otlaridan foydalangan holda fuqarolar va jamoat xavfsizligini ta’minlash, jamoat tartibini saqlashni amalga oshirish;
- xizmat otlaridan foydalangan holda mustaqil va ichki ishlar organlari hamda boshqa maxsus operatsiyalar tuzilmalarining kuchlari bilan hamkorlikda tajovuzkor olomonni tartibga solish, ommaviy tartibsizliklar va jamoat tartibini boshqa guruhli buzilishida faol ishtirok etayotganlar va ularning boshliqlarini aniqlash va qo‘lga olish;
- Patrul marshrutlari va tegishli hududlarda fuqarolar xavfsizligini ta’minlash bo‘yicha evakuatsiya, qutqaruv va boshqa tadbirlarni o‘tkazishda ishtirok etish.
Otlarni o‘rgatish bir yildan bir yarim yilgacha davom etadi. Ular shovqindan hurkmaslikka, portlashdan, tutunli hududlarda qo‘rqmaslikka, hujum qiluvchilarga qarshi chiqishga o‘rgatiladi. Bu maqsadda rossiyalik mutaxassisar bilan hamkorlikda o‘quv mashg‘ulotlari o‘tkaziladi.
Izoh (0)