Тошкент шаҳрида 50 та отдан иборат отлиқ отряд 2017 йилнинг якунигача ўз фаолиятини бошлайди. Отлиқ отряд базаси Чилонзор буюм бозори яқинида жойлашади. Бу ҳақда Тошкент шаҳар ИИББда 8 июнда бўлиб ўтган брифингда Патруль-пост хизмати бригада командири ўринбосари Муродулло Алиқориев маълум қилди.
Ўзбекистонда отлиқ отрядлари 2014 йилда Андижон ва Наманган вилоятларида тузилган. Наманган вилояти ИИБдаги отлиқ отряд 22 нафар ходим ва 22 бош хизмат отидан ташкил топган.
Тошкентда ташкил этиладиган отлиқ отряди қуйидаги вазифаларни бажаради:
- патруль маршрутларида ва тегишли ҳудудларда жамоат тартиби ва хавфсизлигига қарши қаратилган ҳаракатларни ўз вақтида аниқлаш, олдини олиш ва бартараф этиш, шунингдек, ҳуқуқбузарликни содир этган шахсларни қўлга олиш бўйича чоралар кўриш;
- очиқ майдонларда спорт, маданий-томоша ва бошқа оммавий тадбирларни ўтказиш чоғида мобил тўсиқлар ва отрядларни ташкил қилиш;
- очиқ жойларда ўтказиладиган оммавий тадбирларда хизмат отларидан фойдаланган ҳолда фуқаролар ва жамоат хавфсизлигини таъминлаш, жамоат тартибини сақлашни амалга ошириш;
- хизмат отларидан фойдаланган ҳолда мустақил ва ички ишлар органлари ҳамда бошқа махсус операциялар тузилмаларининг кучлари билан ҳамкорликда тажовузкор оломонни тартибга солиш, оммавий тартибсизликлар ва жамоат тартибини бошқа гуруҳли бузилишида фаол иштирок этаётганлар ва уларнинг бошлиқларини аниқлаш ва қўлга олиш;
- Патруль маршрутлари ва тегишли ҳудудларда фуқаролар хавфсизлигини таъминлаш бўйича эвакуация, қутқарув ва бошқа тадбирларни ўтказишда иштирок этиш.
Отларни ўргатиш бир йилдан бир ярим йилгача давом этади. Улар шовқиндан ҳуркмасликка, портлашдан, тутунли ҳудудларда қўрқмасликка, ҳужум қилувчиларга қарши чиқишга ўргатилади. Бу мақсадда россиялик мутахассисар билан ҳамкорликда ўқув машғулотлари ўтказилади.
Изоҳ (0)