Norvegiya Oliy sudi ommaviy qotillik ishi bo‘yicha sudlangan Anders Breyvikning Apellyatsiya sudi ustidan bergan shikoyatini ko‘rib chiqishdan bosh tortdi, deya xabar bermoqda “Kommersant”.
O‘tgan yilning aprel oyida Oslo sudi Anders Breyvikni noinsoniy sharoitlarda saqlashmoqda, deb topgan edi. Bir necha oy avval Norvegiya jinoyatchini qamoqda saqlash tartibini ham nisbatan yumshatgan edi.
Biroq 2017-yilning mart oyida Apellyatsiya sudi Breyvikning huquqlari buzilishi yuzasidan birinchi instansiya sudi qabul qilgan qarorni rad etdi. Breyvik shu sababli Apellyatsiya sudi ustidan Oliy sudga murojaat qilgan edi.
Norvegiya Oliy sudi qarorida qayd etilishicha, Breyvikni qamoqda saqlash sharoitlari inson huquqlarini poymol qilmaydi. “Breyvik apellyatsiyasining hech bir bandi Oliy sud tomonidan qanoatlantirilmadi”, — deya sudyaning so‘zlaridan iqtibos keltirmoqda Reuters.
Breyvik amalga oshirgan teraktlardan omon qolganlar va qurbonlarining qarindoshlari Oliy sud qarorini olqishladi.
“Bu bizning odil sud tizimimiz ishlayotganini tasdiqlovchi juda yaxshi xabar. Ushbu qaror biz ko‘plab yillar davomida bu terrorchini ko‘rmasligimizni kafolatlaydi”, — dedi 18 yoshli qizi Sinna Breyvik tomonidan otib tashlangan Lizbet Kristin Royneland.
Terrorchining advokatlari esa Anders Breyvik holat yuzasidan inson huquqlari bo‘yicha Yevropa sudiga murojaat etishini ma’lum qildi.
Eslatib o‘tamiz, 2012-yili terrorchi 21 yilga ozodlikdan mahrum etilgan edi. U 2011-yilning 22-iyul kuni Oslo markazida sakkiz kishini, Oslo chekkasidagi yoshlar lagerida 69 kishini o‘ldirishda aybdor deb topilgan edi.
Izoh (0)