Норвегия Олий суди оммавий қотиллик иши бўйича судланган Андерс Брейвикнинг Апелляция суди устидан берган шикоятини кўриб чиқишдан бош тортди, дея хабар бермоқда «Коммерсантъ».
Ўтган йилнинг апрель ойида Осло суди Андерс Брейвикни ноинсоний шароитларда сақлашмоқда, деб топган эди. Бир неча ой аввал Норвегия жиноятчини қамоқда сақлаш тартибини ҳам нисбатан юмшатган эди.
Бироқ 2017 йилнинг март ойида Апелляция суди Брейвикнинг ҳуқуқлари бузилиши юзасидан биринчи инстанция суди қабул қилган қарорни рад этди. Брейвик шу сабабли Апелляция суди устидан Олий судга мурожаат қилган эди.
Норвегия Олий суди қарорида қайд этилишича, Брейвикни қамоқда сақлаш шароитлари инсон ҳуқуқларини поймол қилмайди. «Брейвик апелляциясининг ҳеч бир банди Олий суд томонидан қаноатлантирилмади», — дея судьянинг сўзларидан иқтибос келтирмоқда Reuters.
Брейвик амалга оширган терактлардан омон қолганлар ва қурбонларининг қариндошлари Олий суд қарорини олқишлади.
«Бу бизнинг одил суд тизимимиз ишлаётганини тасдиқловчи жуда яхши хабар. Ушбу қарор биз кўплаб йиллар давомида бу террорчини кўрмаслигимизни кафолатлайди», — деди 18 ёшли қизи Синна Брейвик томонидан отиб ташланган Лизбет Кристин Ройнеланд.
Террорчининг адвокатлари эса Андерс Брейвик ҳолат юзасидан инсон ҳуқуқлари бўйича Европа судига мурожаат этишини маълум қилди.
Эслатиб ўтамиз, 2012 йили террорчи 21 йилга озодликдан маҳрум этилган эди. У 2011 йилнинг 22 июль куни Осло марказида саккиз кишини, Осло чеккасидаги ёшлар лагерида 69 кишини ўлдиришда айбдор деб топилган эди.
Изоҳ (0)