Liviyaning xalqaro hamjamiyat tomonidan tan olingan vaqtinchalik hukumati Qatar bilan diplomatik munosabatlarning to‘xtatilganini bildirdi. Bu haqda, Sky News Arabia telekanaliga asoslanib, “Gazeta.ru” xabar bermoqda.
Ilgariroq bunday qarorini Saudiya Arabistoni, Misr, BAA va Bahrayn e’lon qilgan edi. Keyinroq ular safiga Yaman qo‘shildi.
Liviya muvaqqat hukumati rahbari Muhammad ad-Doiriyning so‘zlariga qaraganda, Qatar arab dunyosi, shu jumladan, Liviya milliy xavfsizligiga tahdid solmoqda.
Shuningdek, Qatar bilan munosabatlarni uzgan davlatlar qatoriga Maldiv orollari qo‘shildi.
Saudiya Arabistoni rahbarligidagi arab koalitsiyasi qo‘mondonligi Qatarning Yamandagi harbiy operatsiyadagi ishtiroki yakunlanganini ma’lum qildi, bunga “Dohaning noqonuniy guruhlar, ‘al-Qoida’ va IShIDni qo‘llab-quvvatlashi” sabab sifatida ko‘rsatildi.O‘z navbatida, Qatar arab davlatlarining diplomatik aloqalarni uzish haqidagi qarorini “noo‘rin” deb baholadi.
Qatar va uning mintaqadagi qo‘shnilari o‘rtasidagi ziddiyat ar-Riyodda bo‘lib o‘tgan Fors ko‘rfazi mamlakatlari va AQSh sammitidan keyin yuzaga keldi. O‘shanda Qatar yangiliklar agentligi mamlakat amiri nomidan nutq e’lon qilgan, unda Eron bilan aloqalar o‘rnatish yoqlab chiqilgan edi. Keyinroq Qatar TIV rasmiy vakili agentlik saytiga xakerlar hujum qilib, nutqni ular joylashtirganini ma’lum qildi. Ammo Saudiya Arabistoni, BAA va Bahrayn bu raddiyani ishonchsiz deb topdi.
Izoh (0)