Qatar arab davlatlarining diplomatik aloqalarni uzish haqidagi qarorini “noo‘rin” deb baholadi

Qatar arab davlatlarining mamlakat bilan diplomatik aloqalarni uzish haqidagi qarorini noo‘rin deb baholaydi. Bu haqda amirlik tashqi ishlar vazirligi ma’lum qildi, deya xabar beradi “TASS”.

“Doha Saudiya Arabistoni, BAA va Bahraynning aloqalarni uzish, chegaralarni yopish haqidagi qaroridan afsus bildiradi  va buni quruq da’volarga asoslangan noo‘rin chora deb hisoblaydi. Biz bu choralar Qatar iqtisodiyoti va uning fuqarolariga ta’sir ko‘rsatmasligiga harakat qilamiz”, — deyiladi vazirlik bayonotida. 

Vazirlik Qatarning mintaqada terrorchi guruhlar va mutaassib mafkurani qo‘llab-quvvatlashga aloqadorligi haqidagi ayblovlarni rad etdi. Amirlik rasmiylariga ko‘ra, Qatar ushbu davlat manfaatlariga zarar yetkazish maqsadida uyushtirilgan axborot xurujiga duch keldi. 

“Qatar boshqa davlatlar suverenitetini hurmat qiladi va ularning ichki ishlariga aralashmaydi. Doha terrorchilik va ekstremizmga qarshi turish borasidagi majburiyatlarini bajarib kelmoqda”, — deb ta’kidlanadi Qatar TIV bayonotida.