Qirg‘iziston poytaxtidagi Pervomaysk tuman sudida 5-iyun, dushanba kuni muxolifatdagi “Otamakon” partiyasi yetakchisi Omurbek Tekebayevga nisbatan jinoiy ishni ko‘rib chiqishni boshladi. Bu haqda “TASS” xabar bermoqda.
Mamlakat bosh prokuraturasi joriy yil 25-fevralda Tekebayevga nisbatan “Korrupsiya” va “Firibgarlik” moddalari bo‘yicha jinoiy ish ochgandi. Ertasiga siyosatchi Venadan uchib kelgan vaqti Bishkek aeroportida qo‘lga olindi.
Omurbek Tekebayev 2010-yili, Qirg‘iziston Muvaqqat hukumati rahbari o‘rinbosari bo‘lib turganda uyali aloqa xizmati bilan shug‘ullanuvchi mahalliy “Alfa Telekom” kompaniyasini xarid qilishda ko‘mak berishni va’da qilib, rossiyalik biznesmen Leonid Mayevskiydan 1 million dollar olganlikda ayblanmoqda. Biroq Tekebayev va’dasini bajarmagan va pullarni ham qaytarmagan.
Izoh (0)