Ramazon oyida isrofni bartaraf qilishda yordam beruvchi 5 ta maslahat

“Muslimaat.uz” muslimalar sahifasi Ramazon oyida oziq-ovqat mahsulotlarini isrof qilish oldini olishda yordam beruvchi maslahatlar bilan bo‘lishdi.

1. Oshxona va muzlatgichingizni yaxshilab tozalang.

Umuman, tozalash va tartiblash ishlari qaysi vaqt bo‘lishidan qat’i nazar muhimdir. Atrofingiz pala-partish bo‘lib turgan bir paytda ibodatlarda fikrni jamlash ancha mushkul. Ayniqsa, ro‘zador holingizda. Shuning uchun tozalik ishlarini hozirdan boshlang.

2. Oshxonangizdagi mahsulotlarni bir yerga jamlang.

Muzlatgich va oshxonani tozalab bo‘lgach, barcha bir xil bo‘lgan mahsulotlarni bir joyga to‘plang. Besh xil turdagi tuz, o‘zingizning ham allaqachon esingizdan chiqib bo‘lgan, lekin har safar xarid varaqangizga qo‘shib boradigan, uch xil idishda quritilgan ko‘katlaringiz borligini ko‘rasiz. Ishonavering, bir “yerga jamlash usuli” karmoningizga ancha foyda keltiradi.

3. Ovqatlar ro‘yxatini mo‘ljallab qo‘ying.

Iloji bo‘lsa Ramazon oyi kirguncha ro‘yxatni tayyorlang. Avvallari ham bu kabi menyu tuzgan bo‘lsangiz, tez va oila a’zolaringizga xush kelgan taomlardan saralab qo‘yishingiz mumkin. Ro‘za vaqtida, iftorlikka yaqin, ochlik o‘zini bildirayotgan paytda tuzib qo‘ygan menyuingiz naqadar qo‘l kelganiga o‘zingiz ham tan berib yuborasiz.

4. Ro‘zador holingizda xarid qilgani bormang.

Tez buzilmaydigan va uzoq saqlanadigan mahsulotlarni oldindan olib qo‘ying. Hozirgi kunda onlayn do‘konlar  mavjud bo‘lib, kundalik ro‘zg‘or mahsulotlarini ham xarid qilishingiz mumkin.

5. Bir kun oldingi taomni tashlab yubormang.

Qolgan ovqatingiz bo‘lsa, tashlab yubormasdan, keyingi saharlik yoki iftorlik vaqtida qo‘shib iste’mol qiling. Isrof qilishdan saqlaning.