Narxi uyniki bilan teng televizorlar: dunyodagi eng qimmatbaho 5 ta model (foto)

“Hi-tech.mail.ru” dunyodagi eng qimmatbaho televizor modellari bilan tanishtirdi.

Samsung UE105S9 — 100 ming dollarlik botiq televizor

Hashamatli 105 dyuymli Samsung UE105S9 5K displeyga ega va 3Dni qo‘llab-quvvatlaydi. Ultra HD botiq ekran tasvirning realligi darajasini oshiradi va filmlarni tomosha qilishni maksimal darajada qulaylashtiradi.

LG 105UC9V — 100 ming dollarlik 3D’li televizor

Yuqoridagi model kabi, bu ham 105 dyuymli 5K ekranga ega bo‘lib, 3D formatini qo‘llab-quvvatlaydi. Televizor qulay va yengil 3D ko‘zoynaklar bilan birga sotiladi, ular batareyasiz ishlaydi.

AVQ VT88S CURVED — 88 ming dollarlik himoyalangan televizor

Uning asosiy o‘ziga xos jihati — himoyalanganligi. Televizor namlik va changdan IP66 standarti bo‘yicha himoyalangan. Ustiga-ustak, korpus ham mustahkam metalldan qilingan bo‘lib, tasodifan yoki ataylab yetkazilgan zararlar cho‘t ham bo‘lmaydi. 88 dyuymli 4K ekranli  televizor videoning barcha formatlarini, wi-fi’ni qo‘llab-quvvatlaydi.

Sony KD-100ZD9 — 70 ming dollarga 100 dyuymli televizor

U HDR Premium texnologiyasini qo‘llab-quvvatlaydi va hatto Netflix kompaniyasidan tavsiyaga ham ega bo‘ldi. Gadjet X1 4K protsessor bilan jihozlangan bo‘lib, u har qanday manbadan olinayotgan videosignalni Ultra HD’gacha takomillashtiradi.

Bang & Olufsen BeoVision Avant 75 — 18 ming dollarga eng mukammal tovush

U 4K ekran, shuningdek, akustika yaratish sohasidagi jahon brendidan ajoyib tovushga ega LED-televizordir. U noyob dizaynli alyuminiy korpusga ega, uning tagligi (podstavka) qurilmaga 90 gradusga burilish imkonini beradi.

Televizorga umumiy quvvati 450 Vt ga teng sakkizta dinamik o‘rnatilgan. Ekrani 75 dyuymli.