Shimoliy Koreyaning Myohyang IT kompaniyasi Ryonghung iPad nomi ostida o‘z planshet kompyuterini chiqardi. Gizmodo’ning yozishicha, kompaniya mahsulot reklamasida o‘z qurilmasini shunchaki iPad deb atagan.
Planshet chastotasi 1,2 gigagers bo‘lgan to‘rt yadroli protsessor va bir gigabaytli operativ xotira bilan ta’minlangan. Shimoliy Koreyada ishlab chiqarilgan qurilmaning ichki xotirasi sakkiz gigabaytga teng. Ishlab chiqaruvchilarning ta’kidlashicha, mahsulot mahalliy nazorat organi tomonidan sertifikatlashtirilgan.
“Ryonghung iPad xaridorlar orasida juda mashhur. U bir qator funksiyalarni bajara oladi, jumladan, raqamli axborotning turli manbalarini o‘qiy oladi, shuningdek, ofis ishlarini bajarish va hujjatlar bilan ishlashda ham yordam ko‘rsatadi”, — deyiladi mahsulot broshyurasida.
Qayd etishlaricha, Ryongung iPad’ga qo‘shib “tarmoq orqali ulanadigan” klaviatura ham beriladi. Planshetga oldindan 40 ta mobil dastur o‘rnatilgan bo‘lib, ular orasida kalkulyator, salomatlik ensiklopediyasi va Good Doctor 3.0 tibbiy servisi bor.
Bu Shimoliy Koreyada Apple mahsulotlaridan nusxa ko‘chirish bilan bog‘liq birinchi holat emas. 2015-yili Pxenyanda iMac’ga juda o‘xshash monoblok savdosi boshlangan edi.
Bundan tashqari, Shimoliy Koreyada Fedora Linux bazasida Red Star OS operatsion tizimi ishlab chiqilgan bo‘lib, uning interfeysi Mac OS X’dan ko‘chirilgan.
Izoh (0)