Millionlab muxlislar qalbidan joy olgan futbol yulduzi Franchesko Totti kecha — 28-may kuni Rimning “Roma” klubi safida so‘nggi uchrashuvini o‘tkazdi. Shu kuni Totti bilan xayrlashish istagida bo‘lgan minglab muxlislar “Olimpiko” tomon oshiqdi.
Francheskoni Rimdan kuzatish marosimini ko‘rish uchun raqib “Jenoa” hamda “Latsio” muxlislari ham “Olimpiko” tomon shoshilayotgandi va ular ham raqib jamoa futbolchisini olqishlash uchun 10-raqamli futbolkalarni ilib olgandi. Boisi, Totti nafaqat “Roma”ning, balki butun Italiya futboli timsoliga aylanib ulgurgandi.
1975-yilning 27-sentabrida dunyoga kelgan Totti Italiya terma jamoasi safida 58 ta o‘yinda maydonga tushdi va 9 ta gol urishga muvaffaq bo‘ldi. Bunga qadar u Italiyaning barcha yosh termalari safida to‘p surgandi.
Totti 1989-yil “Roma” bilan shartnoma imzoladi. 1992-yildan boshlab esa asosiy jamoaga qabul qilindi. O‘tgan chorak asr davomida u “Roma” libosini yechgani yo‘q. Bu vaqt davomida Totti “bo‘rilar”ning 618 ta o‘yinida maydonga tushib, 250 ta gol urishga muvaffaq bo‘ldi.
Franchesko bilan Italiya terma jamoasi 2006-yil jahon chempionligini qo‘lga kiritdi, 2000-yil esa Yevropa chempionatining finaliga qadar yetib bordi. “Roma” bilan 2001-yil A seriya chempionligini nishonlagan Totti, 9 marta mamlakat vitse-chempionligiga erishdi. Ikki marta Italiya kubogini boshi uzra baland ko‘tardi.
Totti 2007-yil “Oltin butsa” sohibiga aylandi, oradan uch yil o‘tib “Oltin oyoq” egasi bo‘ldi. Ammo futbolning tirik afsonasiga “Oltin to‘p”ni qo‘lga kiritish va Yevropa Chempionlar ligasida zafar quchish nasib qilmadi.
Izoh (0)