Миллионлаб мухлислар қалбидан жой олган футбол юлдузи Франческо Тотти кеча — 28 май куни Римнинг «Рома» клуби сафида сўнгги учрашувини ўтказди. Шу куни Тотти билан хайрлашиш истагида бўлган минглаб мухлислар «Олимпико» томон ошиқди.
Франческони Римдан кузатиш маросимини кўриш учун рақиб «Женоа» ҳамда «Лацио» мухлислари ҳам «Олимпико» томон шошилаётганди ва улар ҳам рақиб жамоа футболчисини олқишлаш учун 10-рақамли футболкаларни илиб олганди. Боиси, Тотти нафақат «Рома»нинг, балки бутун Италия футболи тимсолига айланиб улгурганди.
1975 йилнинг 27 сентябрида дунёга келган Тотти Италия терма жамоаси сафида 58 та ўйинда майдонга тушди ва 9 та гол уришга муваффақ бўлди. Бунга қадар у Италиянинг барча ёш термалари сафида тўп сурганди.
Тотти 1989 йил «Рома» билан шартнома имзолади. 1992 йилдан бошлаб эса асосий жамоага қабул қилинди. Ўтган чорак аср давомида у «Рома» либосини ечгани йўқ. Бу вақт давомида Тотти «бўрилар»нинг 618 та ўйинида майдонга тушиб, 250 та гол уришга муваффақ бўлди.
Франческо билан Италия терма жамоаси 2006 йил жаҳон чемпионлигини қўлга киритди, 2000 йил эса Европа чемпионатининг финалига қадар етиб борди. «Рома» билан 2001 йил А серия чемпионлигини нишонлаган Тотти, 9 марта мамлакат вице-чемпионлигига эришди. Икки марта Италия кубогини боши узра баланд кўтарди.
Тотти 2007 йил «Олтин бутса» соҳибига айланди, орадан уч йил ўтиб «Олтин оёқ» эгаси бўлди. Аммо футболнинг тирик афсонасига «Олтин тўп»ни қўлга киритиш ва Европа Чемпионлар лигасида зафар қучиш насиб қилмади.
Изоҳ (0)