Futbol bo‘yicha O‘zbekiston Oliy ligasining 11-turidan joy olgan “Buxoro” — “Navbahor” (3:3) o‘yini PFL tomonidan o‘rganib chiqildi. Bu haqda tashkilot matbuot xizmati xabar berdi.
Uchrashuv tanaffusida “Buxoro” bosh murabbiyi Ulug‘bek Baqoyev “Navbahor”dagi hamkasbi Ilhom Mo‘minjonov bilan janjallashib qolgani uchun, har ikki mutaxassis andijonlik hakam Temur To‘xtasinovdan qizil kartochka olgandi. PFL vaziyatni o‘rganib chiqib, har ikki murabbiyni 1 tadan uchrashuvga diskvalifikatsiya qildi.
Ulug‘bek Baqoyev hamda Ilhom Mo‘minjonov, shuningdek, moddiy jarimaga ham tortilgan. Biroq jarimaning qancha ekani PFL tomonidan ochiqlanmagan.
Mazkur uchrashuvda hakam “Buxoro”dan Ergash Ismoilov va “Navbahor”dan Oybek Qilichevni qizil kartochka bilan haydab yuborgandi. PFL bunda jazo chorasini faqatgina Oybek Qilichevga qo‘llagan.
“Navbahor” yarim himoyachisi Oybek Qilichev, 11-turdagi “Buxoro”ga qarshi o‘yinda raqibning yuziga qo‘li bilan urgani uchun uchun, 2 ta uchrashuvga diskvalifikatsiya qilindi va jarimaga tortildi, deb yozilgan PFL bayonotida. Jarima miqdori yana ko‘rsatilmagan.
“Navbahor”ning boshqa bir a’zosi Alisher Samatov O‘zbekiston kubogining “Neftchi”ga qarshi bo‘lib o‘tgan birinchi uchrashuvidagi agressiv harakati uchun 2 ta uchrashuvga chetlatilgan.
Izoh (0)