Футбол бўйича Ўзбекистон Олий лигасининг 11-туридан жой олган «Бухоро» — «Навбаҳор» (3:3) ўйини ПФЛ томонидан ўрганиб чиқилди. Бу ҳақда ташкилот матбуот хизмати хабар берди.
Учрашув танаффусида «Бухоро» бош мураббийи Улуғбек Бақоев «Навбаҳор»даги ҳамкасби Илҳом Мўминжонов билан жанжаллашиб қолгани учун, ҳар икки мутахассис андижонлик ҳакам Темур Тўхтасиновдан қизил карточка олганди. ПФЛ вазиятни ўрганиб чиқиб, ҳар икки мураббийни 1 тадан учрашувга дисквалификация қилди.
Улуғбек Бақоев ҳамда Илҳом Мўминжонов, шунингдек, моддий жаримага ҳам тортилган. Бироқ жариманинг қанча экани ПФЛ томонидан очиқланмаган.
Мазкур учрашувда ҳакам «Бухоро»дан Эргаш Исмоилов ва «Навбаҳор»дан Ойбек Қиличевни қизил карточка билан ҳайдаб юборганди. ПФЛ бунда жазо чорасини фақатгина Ойбек Қиличевга қўллаган.
«Навбаҳор» ярим ҳимоячиси Ойбек Қиличев, 11-турдаги «Бухоро»га қарши ўйинда рақибнинг юзига қўли билан ургани учун учун, 2 та учрашувга дисквалификация қилинди ва жаримага тортилди, деб ёзилган ПФЛ баёнотида. Жарима миқдори яна кўрсатилмаган.
«Навбаҳор»нинг бошқа бир аъзоси Алишер Саматов Ўзбекистон кубогининг «Нефтчи»га қарши бўлиб ўтган биринчи учрашувидаги агрессив ҳаракати учун 2 та учрашувга четлатилган.
Изоҳ (0)