O‘zbekiston Prezidenti Shavkat Mirziyoyevning Xitoyga davlat tashrifi doirasida 13-may kuni Buxoro va Loyan shaharlari o‘rtasida birodarlik munosabatlari to‘g‘risidagi memorandum imzolandi. Buxoro shahri hokimi Ixtiyor Farmonovning so‘zlariga ko‘ra, bu “mamlakatlarimiz hududlari o‘rtasida rivojlanib borayotgan hamkorlik aloqalarining o‘ziga xos ifodasi bo‘ldi”.
Buxoro — jahon tarixida o‘ziga xos o‘ringa ega bo‘lgan Somoniylar davlati va Buxoro xonligi/amirligining markazi, nomi O‘zbekiston bo‘lgan zamonaviy davlatning ilk poytaxti. Loyan esa Xitoyning to‘rtta buyuk qadimiy poytaxtidan biri sanaladi. Buxoroga taxminan 2,5 ming avval asos solingan, deb taxmin qilinadi; Loyanning tarixi esa, tarixiy solnomalarga ko‘ra, miloddan avvalgi 2070-yildan boshlanadi.
Xitoyning Xenan viloyati g‘arbida joylashgan Loyanda, 2010-yil ma’lumotlariga ko‘ra, 1 milliondan ziyod aholi istiqomat qiladi (shahar okrugidagi aholi soni esa 7 millionga yaqin). Shaharda sanoat taraqqiy etgan, biroq uning asosiy ustun jihati — butun dunyo sayyohlarini o‘ziga jalb etadigan tarixiy yodgorliklaridir (bu jihati bo‘yicha Loyan yana bir bor Buxoroga o‘xshash!).
Buxoroning tarixiy markazi 1993-yili YuNESKOning Butunjahon merosi obyektlari ro‘yxatiga kirgan. Bu ro‘yxatdan 2000-yili Loyandagi aqlbovar qilmas obida — Lunmen buddaviy g‘or ibodatxonalari (“Ajdaho darvozalari oldidagi tosh g‘orlar”) o‘rin olgan.
Ixe daryosi bo‘yidagi ohaktosh qoyalariga milodning 495—898-yillarda o‘yib ishlangan bu obida Xitoydagi eng muhim uchta g‘or-ibodatxona majmualaridan biridir.
Rasmiy hisob-kitoblarga ko‘ra, bu yerda 43 ibodatxonani o‘zida birlashtirgan 2345 ta g‘or va chuqurliklar bor, ularda esa diniy mazmundagi 2800 ga yaqin yozuv va qariyb 100 mingta suratlar aks etgan.
G‘or-ibodatxonalar ichida 1500 yil avval ishlangan buddaviy ma’budlar, rohiblar, samoviy raqqosalar, tantanali marosimlarning haykal va bo‘rtma tasvirlarini uchratish mumkin.
Loyanning tarixiy darvozalari
Shaolin ibodatxonasi
Oq ot ibodatxonasi — Xitoydagi ilk buddaviy ibodatxona
Uch qirollik davri qahramoni — marshal Guan Yuy sharafiga qurilgan Guanlin ibodatxonalar majmuasi
Tyan va Min ibodatxonalari
Buddaviy pagodalar o‘rmoni
Buxoroda har yili “Ipak va ziravorlar” festivali o‘tkaziladi. Piongullar esa Buxoro bilan birodarlashgan Loyanning tashrif qog‘ozidir — shaharda 1983-yildan beri har yil aprel oyida piongullar ko‘rgazmasi bo‘lib o‘tadi va u sayyoraning turli tomonlaridan millionlab sayyohlarni o‘ziga chorlaydi.
Aytmoqchi, Loyan Buxorodan tashqari Yaponiyaning Okayama, Sukagava va Kasixara, Fransiyaning Tur, Rossiyaning Tolyatti, Bolgariyaning Plovdiv va AQShning La-Kross shaharlari bilan ham birodarlashgan.
Izoh (0)