Ўзбекистон Президенти Шавкат Мирзиёевнинг Хитойга давлат ташрифи доирасида 13 май куни Бухоро ва Лоян шаҳарлари ўртасида биродарлик муносабатлари тўғрисидаги меморандум имзоланди. Бухоро шаҳри ҳокими Ихтиёр Фармоновнинг сўзларига кўра, бу «мамлакатларимиз ҳудудлари ўртасида ривожланиб бораётган ҳамкорлик алоқаларининг ўзига хос ифодаси бўлди».
Бухоро — жаҳон тарихида ўзига хос ўринга эга бўлган Сомонийлар давлати ва Бухоро хонлиги/амирлигининг маркази, номи Ўзбекистон бўлган замонавий давлатнинг илк пойтахти. Лоян эса Хитойнинг тўртта буюк қадимий пойтахтидан бири саналади. Бухорога тахминан 2,5 минг аввал асос солинган, деб тахмин қилинади; Лояннинг тарихи эса, тарихий солномаларга кўра, милоддан аввалги 2070 йилдан бошланади.
Хитойнинг Хенан вилояти ғарбида жойлашган Лоянда, 2010 йил маълумотларига кўра, 1 миллиондан зиёд аҳоли истиқомат қилади (шаҳар округидаги аҳоли сони эса 7 миллионга яқин). Шаҳарда саноат тараққий этган, бироқ унинг асосий устун жиҳати — бутун дунё сайёҳларини ўзига жалб этадиган тарихий ёдгорликларидир (бу жиҳати бўйича Лоян яна бир бор Бухорога ўхшаш!).
Бухоронинг тарихий маркази 1993 йили ЮНЕСКОнинг Бутунжаҳон мероси объектлари рўйхатига кирган. Бу рўйхатдан 2000 йили Лояндаги ақлбовар қилмас обида — Лунмэнь буддавий ғор ибодатхоналари («Аждаҳо дарвозалари олдидаги тош ғорлар») ўрин олган.
Ихэ дарёси бўйидаги оҳактош қояларига милоднинг 495—898 йилларда ўйиб ишланган бу обида Хитойдаги энг муҳим учта ғор-ибодатхона мажмуаларидан биридир.
Расмий ҳисоб-китобларга кўра, бу ерда 43 ибодатхонани ўзида бирлаштирган 2345 та ғор ва чуқурликлар бор, уларда эса диний мазмундаги 2800 га яқин ёзув ва қарийб 100 мингта суратлар акс этган.
Ғор-ибодатхоналар ичида 1500 йил аввал ишланган буддавий маъбудлар, роҳиблар, самовий раққосалар, тантанали маросимларнинг ҳайкал ва бўртма тасвирларини учратиш мумкин.
Лояннинг тарихий дарвозалари
Шаолинь ибодатхонаси
Оқ от ибодатхонаси — Хитойдаги илк буддавий ибодатхона
Уч қироллик даври қаҳрамони — маршал Гуань Юй шарафига қурилган Гуаньлинь ибодатхоналар мажмуаси
Тянь ва Минь ибодатхоналари
Буддавий пагодалар ўрмони
Бухорода ҳар йили «Ипак ва зираворлар» фестивали ўтказилади. Пионгуллар эса Бухоро билан биродарлашган Лояннинг ташриф қоғозидир — шаҳарда 1983 йилдан бери ҳар йил апрель ойида пионгуллар кўргазмаси бўлиб ўтади ва у сайёранинг турли томонларидан миллионлаб сайёҳларни ўзига чорлайди.
Айтмоқчи, Лоян Бухородан ташқари Япониянинг Окаяма, Сукагава ва Касихара, Франциянинг Тур, Россиянинг Тольятти, Болгариянинг Пловдив ва АҚШнинг Ла-Кросс шаҳарлари билан ҳам биродарлашган.
Изоҳ (0)