O‘zbekiston Intellektual mulk agentligi Butunjahon intellektual mulk tashkiloti (BIMT) bilan hamkorlikda 17–18-may kunlari “Milliy va xalqaro patent tizimi. Elektron tarzda talabnomalar topshirish va patent jarayonlarini elektron tarzda amalga oshirish” mavzusida mintaqaviy seminar o‘tkazdi. Bu haqda “Daryo”ga agentlik matbuot xizmati xabar qildi.
Seminarning maqsadi ishtirokchilarni intellektual mulk tizimini rivojlantirish bilan bog‘liq faoliyati, patentlarni himoya qilish va ulardan foydalanish, RST — xalqaro patent tizimi, ePCT tizimidan foydalanish bilan tanishtirish va axborot texnologiyalardan foydalangan holda patent tizimidagi xizmatlarni yaxshilash edi. Shuningdek, milliy patent tizimining patent muhofazasini soddalashtirish, elektron tarzda talabnomalarni topshirish, qabul qilish va ko‘rib chiqishni joriy qilish, ushbu sohada xorijiy tajribani o‘rganish singari masalalar kun tartibida bo‘ldi.
Seminarda BIMT vakillari, Rossiya, Koreya Respublikasi, Yaponiya, Ozarbayjon, Qozog‘iston, Ukraina va O‘zbekiston mutaxassislari tomonidan RST – xalqaro patent tizimi va BIMTning boshqa onlayn vositalaridan foydalanish, Yevrosiyo patent tashkilotining (EAPO) patent muhofazasi bo‘yicha mintaqaviy tizimi, elektron xizmatlar va mahsulotlar masalalari keng yoritildi hamda O‘zbekiston va boshqa davlatlarda milliy patent tizimlarini rivojlantirish muammolari va istiqbollari muhokama qilindi.
Seminarda BIMT vakili tomonidan eRST tizimi bo‘yicha taqdimot o‘tkazildi va RST talabnomalari bo‘yicha ish yuritish bo‘yicha ma’lumotlar berildi. Shuningdek, EAPO vakili Yevrosiyo patent tashkilotining elektron xizmatlari to‘g‘risidagi ma’lumotlarni taqdim etdi.
Tadbir davomida Yaponiya, Janubiy Koreya, Rossiya, Qozog‘iston va Ukraina kabi davlatlarda patent tizimi foydalanuvchilariga yuqori sifatli xizmatlarni taqdim etishni ta’minlash bo‘yicha masalalar muhokama etildi.
Izoh (0)