Ўзбекистон Интеллектуал мулк агентлиги Бутунжаҳон интеллектуал мулк ташкилоти (БИМТ) билан ҳамкорликда 17–18 май кунлари «Миллий ва халқаро патент тизими. Электрон тарзда талабномалар топшириш ва патент жараёнларини электрон тарзда амалга ошириш» мавзусида минтақавий семинар ўтказди. Бу ҳақда «Дарё»га агентлик матбуот хизмати хабар қилди.
Семинарнинг мақсади иштирокчиларни интеллектуал мулк тизимини ривожлантириш билан боғлиқ фаолияти, патентларни ҳимоя қилиш ва улардан фойдаланиш, RST — халқаро патент тизими, eRST тизимидан фойдаланиш билан таништириш ва ахборот технологиялардан фойдаланган ҳолда патент тизимидаги хизматларни яхшилаш эди. Шунингдек, миллий патент тизимининг патент муҳофазасини соддалаштириш, электрон тарзда талабномаларни топшириш, қабул қилиш ва кўриб чиқишни жорий қилиш, ушбу соҳада хорижий тажрибани ўрганиш сингари масалалар кун тартибида бўлди.
Семинарда БИМТ вакиллари, Россия, Корея Республикаси, Япония, Озарбайжон, Қозоғистон, Украина ва Ўзбекистон мутахассислари томонидан RST – халқаро патент тизими ва БИМТнинг бошқа онлайн воситаларидан фойдаланиш, Евросиё патент ташкилотининг (EAPO) патент муҳофазаси бўйича минтақавий тизими, электрон хизматлар ва маҳсулотлар масалалари кенг ёритилди ҳамда Ўзбекистон ва бошқа давлатларда миллий патент тизимларини ривожлантириш муаммолари ва истиқболлари муҳокама қилинди.
Семинарда БИМТ вакили томонидан eRST тизими бўйича тақдимот ўтказилди ва RST талабномалари бўйича иш юритиш бўйича маълумотлар берилди. Шунингдек, EAPO вакили Евросиё патент ташкилотининг электрон хизматлари тўғрисидаги маълумотларни тақдим этди.
Тадбир давомида Япония, Жанубий Корея, Россия, Қозоғистон ва Украина каби давлатларда патент тизими фойдаланувчиларига юқори сифатли хизматларни тақдим этишни таъминлаш бўйича масалалар муҳокама этилди.
Изоҳ (0)