Xayriya aksiyasi doirasida Orolbo‘yiga tashkil etilgan navbatdagi “Salomatlik poyezdi”ning dastlabki manzili Qo‘ng‘irot tumani bo‘ldi. Bu haqda O‘zA xabar bermoqda.
“Xalq bilan muloqot va inson manfaatlari yili” Davlat dasturi ijrosi doirasida “Sog‘lom avlod uchun” xalqaro xayriya fondi va “O‘zbekiston temir yo‘llari” aksiyadorlik jamiyati hamkorligida tashkil etilgan tadbir davomida 1 ming 350 ga yaqin aholi yuqori malakali shifokorlar tomonidan chuqurlashtirilgan tibbiy ko‘rikdan o‘tkazilib, manzilli muruvvat yordami ko‘rsatildi.
“Salomatlik poyezdi”da ekologik jihatdan noqulay sharoitda istiqomat qilayotgan aholiga yordam tariqasida 15 milliard 167 million so‘mlik dori-darmon, oziq-ovqat mahsulotlari, kattalar va bolalar kiyimlari, poyafzallar, sanitariya-gigiyena vositalari olib kelindi.
– Dori-darmon va tibbiy anjomlar, sanitariya-gigiyena vositalari, kiyim-kechak va oziq-ovqat mahsulotlari Muruvvat va Mehribonlik uylari, maxsus maktab-internatlarga tarqatildi, – deydi “Sog‘lom avlod uchun” xalqaro xayriya fondi Qoraqalpog‘iston Respublikasi filiali rahbari O‘rozgul Yembergenova. – Aksiya doirasida Qo‘ng‘irot, Qanliko‘l va Shumanay tumanlarida yashovchi 2 mingdan ziyod ijtimoiy himoyaga muhtoj aholiga ana shunday yordam berildi.
“Salomatlik poyezdi” To‘rtko‘l va Miskin temiryo‘l bekatlarida bo‘lib, Amudaryo, Beruniy, To‘rtko‘l va Ellikqal’a tumanlari aholisiga tibbiy yordam ko‘rsatmoqda.
Izoh (0)