Rossiya va Saudiya Arabistoni OPEK va alyansga a’zo bo‘lmagan mamlakatlarning neft qazib olishni qisqartirish bo‘yicha kelishuvini yana 9 oy — 2018-yil marti oxirigacha uzaytirishga tayyor. Bu haqda ikki mamlakat energetika vazirlari Aleksandr Novak va Xolid al-Falixning qo‘shma bayonotida ma’lum qilindi, deya xabar beradi “Korrespondent.net”.
“Vazirlar bozorni barqarorlashtirish bo‘yicha urinishlarning asosiy maqsadi — neftning dunyodagi zaxiralari hajmini 5 yil davomidagi o‘rtacha ko‘rsatkichlarga keltirish, shuningdek, ishlab chiqaruvchilarning barqarorlikni ta’minlash bo‘yicha qat’iyatini tasdiqlash uchun kelishuvni 2018-yil 31-martgacha uzaytirish zarurligi haqidagi xulosaga keldi”, — deyiladi bayonotda.
Novak va Falix neft qazib olishni qisqartirish to‘g‘risidagi kelishuv xomashyoning dunyo zaxiralari qisqarib borishi va neftga bo‘lgan talab oshishiga olib kelganini ta’kidladi.
Ma’lumot uchun, OPEK 25-may kuni Venada bo‘lib o‘tadigan navbatdagi yig‘ilishida neft qazib olishni qisqartirish bo‘yicha kelishuvni uzaytirish masalasini ko‘rib chiqadi.
Izoh (0)