Samsung Galaxy S8: ixcham korpusga jam bo‘lgan hashamat va funksionallik

29-mart kuni rasman taqdim etilgan Samsung Galaxy S8 smartfoni, nihoyat, “Daryo” muxbirlari qo‘liga kelib tushdi. Smartfon va uning “akasi” S8 Plus haqida rasmiy taqdimotga qadar deyarli barcha ma’lumotlar tarqalib ulgurgan bo‘lsa-da, biz smartfon bilan yaqindan tanishib chiqqach, u haqida xolisona fikrlarimiz bilan bo‘lishishga qaror qildik.

Uzunchoq va silliq korpus

Telefon old panelining deyarli butun yuzasini qoplagan 5,8 dyuymli uzunchoq ekran smartfonda e’tiborimizni tortgan birinchi narsa bo‘ldi. Ustiga-ustak, ekranning ikki yoni ham pastga qayrilib tushgan. Noodatiy tarzda katta ekrandan foydalanish ham biroz noodatiy va noqulayroq — bunda ikkita qo‘lni ham ishga solmasdan iloj yo‘q, ammo smartfonning dabdabali va hashamatli ko‘rinishi evaziga bu “kamchilik”ka ko‘z yumish mumkin.

Shuningdek, ekranning har qanday tugmalardan xoli ekanligi, old panel qirralarida esa hech qanday rom yoki hoshiyalarning yo‘qligi smartfonni shunchalik silliq holatga keltirganki, barmoqlardan ekranda sezilarli izlar qoladi, smartfonning qo‘ldan sirg‘alib tushib ketishi esa juda oson (biz bir necha marta bunday vaziyatga tushdik). Bunday vaziyatdan ixcham g‘ilof bilan chiqib ketish mumkin, bizningcha.

Always On Display

O‘tgan yilgi Samsung Galaxy S7 va S7 Edge smartfonlarini tutib ko‘rmaganlar uchun Galaxy S8’dagi Always On Display funksiyasi yangilik bo‘ladi. Shu tufayli bu funksiyaga to‘xtalib o‘tishga qaror qildik. Uning qulayligi shundaki, ekran o‘chiq paytda qora fonda soat, sana, batareya miqdori va bildirishnomalar aks etib turadi. Uni sozlamalardagi “Blokirovka ekrani va himoya” bo‘limi orqali o‘zingizga moslashtirishingiz, shu jumladan, ekranda nimalar aks etishini tanlashingiz, Always On Display qanday vaqtlar oralig‘ida yonishini belgilashingiz mumkin, shuningdek, ushbu funksiyani butunlay o‘chirib qo‘yish ham mumkin.

Ushbu faol funksiya smartfon quvvatini “yeyish”ga katta hissa qo‘shishini hisobga olib, biz funksiyani o‘chirib qo‘yishni afzal ko‘rdik.

Qorong‘ilikda ham sifatli suratlar

Samsung Galaxy S8’ning 12 megapikselli asosiy va 8 megapikselli old kamerasi bilan ajoyib sifatli suratlarni olish mumkin.

Rasmiy tavsifida keltirilganidek, smartfon qorong‘ilikda ham detallarni qochirmasdan, aniq-ravshan suratga tushiradi, shuningdek, Dual Pixel texnologiyasi tezkor avtofokusni ta’minlaydi, natijada eng keskin harakatlarni ham kadrga muhrlash mumkin.

Ammo selfi olish vaqtida telefonning silliq va uzun korpusi yana noqulaylik tug‘dirishi mumkin. Internet kengliklarini izlashtirib, smartfondagi pulsometr yordamida selfi olish imkoniyatining borligidan xabar topdik.

Ma’lum bo‘lishicha, bu funksiya yangi emas — u birinchi bo‘lib Galaxy Note 4’da qo‘llanilgan. Pulsometr yordamida selfi olish uchun, dastlab bu funksiyani kamera sozlamalariga kirib yoqish kerak bo‘ladi (menyudagi “Suratga olish usullari” bandiga kiring va “Puls datchigiga tegish”ni yoqing).

Endi selfi olish vaqtida ikkala qo‘lni ham band qilish o‘rniga, telefonni tutib turgan qo‘l barmog‘ini orqa panelda kamera yonida joylashgan puls datchigiga tekkizish va suratga tushirish mumkin.

Eng qimmatbaho zamonaviy smartfon

Samsung Galaxy S8 va S8 Plus smartfonlari savdosi 21-aprel kuni boshlandi. Sotilayotgan bozordan kelib chiqib, Samsung smartfonining narxi kichik model uchun 720 dollar yoki 800 yevroni, katta model uchun esa 840 dollar yoki 900 yevroni tashkil qiladi. GSM Arena nashri tashkil qilgan so‘rovda ishtirokchilarning 72 foizi gadjetning narxini haddan tashqari baland deb topgan bo‘lsa-da, tahlillar smartfonning tannarxi ham shunga yarasha baland ekanligini ko‘rsatdi: Samsung Galaxy S8 tannarx nuqtai nazaridan eng qimmatbaho zamonaviy smartfon deb e’tirof etildi. Uni ishlab chiqarish kompaniyaga 307,5 dollarga tushadi. Bu Apple o‘z iPhone 7 smartfoniga sarflaydigan mablag‘ (224,8 dollar)dan 35 foizga ko‘p demakdir. Shu bilan birga, Samsung bitta Galaxy S8’ni sotishdan taxminan 88,2 dollar daromad oladi.

Samsung Galaxy S8 O‘zbekistonda ham sotuvga chiqdi. “Mobinfo.uz” nashri yozishicha, Toshkentdagi “Malika” savdo markazida smartfon hozircha rekord darajadagi narxda — 6,5 million so‘mga sotilmoqda. Taqqoslash uchun, ayni paytda o‘tgan yilgi flagman — Galaxy S7 Edge’ning narxi 4,6 million so‘mni tashkil qiladi. Galaxy S6 Edge esa 3,3 million so‘mga sotilmoqda.

Samsung Galaxy S8 haqidagi ba’zi foydali ma’lumotlar

Ekran pikselini o‘zgartirish mumkin

Matritsaning o‘zi 1440×2960 pikselli, ammo menyu orqali uni 2220×1080 va hatto 1480×720 pikselli qilish mumkin — dasturlar elementlari, grafika va boshqalar aynan shunday aks etadi. Bu quvvatni tejash uchun kerak bo‘ladi.

Snapdragon’mi Exynos?

Energiya jihatidan samarali Qualcomm Snapdragon 835 Galaxy S8’ning Amerika uchun moslashtirilgan versiyasida bo‘ladi, bizgacha yetib keladiganlari Exynos 8895 chipida ishlaydi.

Barmoq izi skaneri orqa panelda

Orqa paneldagi barmoq izi skaneri Samsung telefonlaridan foydalanib kelganlar uchun g‘alati tuyuladi. Ustiga-ustak, skaner korpus o‘rtasida emas, kamera yonida joylashgan.

Bixby ovozli yordamchi

Ovozli yordamchiga katta e’tibor qaratildi va hatto chap yondan alohida tugma ham ajratildi. U tabiiy tilni tushunadi va zarur bo‘lganida topshiriqlarni bo‘lib-bo‘lib bajaradi, qaysidir narsalarni aniqlashtirish uchun qayta so‘raydi. Ammo Bixby hozircha o‘zbek tiliga moslashtirilmagan.

Xulosa o‘rnida

Ekspertlar yangi Samsung Galaxy S8 nafaqat tashqi ko‘rinishi, balki ichki xususiyatlari va funksiyalari bilan avvalgi modellardan farqlana olgan hamda shularning barchasini ixchamgina korpusiga jamlay olgan smartfon deb baholamoqda.

Galaxy S8’ni sotib olish borasida ikkilanayotganlarga aytishimiz mumkin bo‘lgan yagona narsa shuki, tannarx jihatidan eng qimmatbaho smartfonni sotib olishga sizni yo nafosatga, yo funksionallikka bo‘lgan moyilligingiz unday olishi mumkin, shu ikki jihatni baravar qidirganlar ham ularni aynan ushbu qurilmadan topadi.