Samsung Galaxy S8: ихчам корпусга жам бўлган ҳашамат ва функционаллик

29 март куни расман тақдим этилган Samsung Galaxy S8 смартфони, ниҳоят, «Дарё» мухбирлари қўлига келиб тушди. Смартфон ва унинг «акаси» S8 Plus ҳақида расмий тақдимотга қадар деярли барча маълумотлар тарқалиб улгурган бўлса-да, биз смартфон билан яқиндан танишиб чиққач, у ҳақида холисона фикрларимиз билан бўлишишга қарор қилдик.

Узунчоқ ва силлиқ корпус

Телефон олд панелининг деярли бутун юзасини қоплаган 5,8 дюймли узунчоқ экран смартфонда эътиборимизни тортган биринчи нарса бўлди. Устига-устак, экраннинг икки ёни ҳам пастга қайрилиб тушган. Ноодатий тарзда катта экрандан фойдаланиш ҳам бироз ноодатий ва ноқулайроқ — бунда иккита қўлни ҳам ишга солмасдан илож йўқ, аммо смартфоннинг дабдабали ва ҳашаматли кўриниши эвазига бу «камчилик»ка кўз юмиш мумкин.

Шунингдек, экраннинг ҳар қандай тугмалардан холи эканлиги, олд панель қирраларида эса ҳеч қандай ром ёки ҳошияларнинг йўқлиги смартфонни шунчалик силлиқ ҳолатга келтирганки, бармоқлардан экранда сезиларли излар қолади, смартфоннинг қўлдан сирғалиб тушиб кетиши эса жуда осон (биз бир неча марта бундай вазиятга тушдик). Бундай вазиятдан ихчам ғилоф билан чиқиб кетиш мумкин, бизнингча.

Always On Display

Ўтган йилги Samsung Galaxy S7 ва S7 Edge смартфонларини тутиб кўрмаганлар учун Galaxy S8’даги Always On Display функцияси янгилик бўлади. Шу туфайли бу функцияга тўхталиб ўтишга қарор қилдик. Унинг қулайлиги шундаки, экран ўчиқ пайтда қора фонда соат, сана, батарея миқдори ва билдиришномалар акс этиб туради. Уни созламалардаги «Блокировка экрани ва ҳимоя» бўлими орқали ўзингизга мослаштиришингиз, шу жумладан, экранда нималар акс этишини танлашингиз, Always On Display қандай вақтлар оралиғида ёнишини белгилашингиз мумкин, шунингдек, ушбу функцияни бутунлай ўчириб қўйиш ҳам мумкин.

Ушбу фаол функция смартфон қувватини «ейиш»га катта ҳисса қўшишини ҳисобга олиб, биз функцияни ўчириб қўйишни афзал кўрдик.

Қоронғиликда ҳам сифатли суратлар

Samsung Galaxy S8’нинг 12 мегапикселли асосий ва 8 мегапикселли олд камераси билан ажойиб сифатли суратларни олиш мумкин.

Расмий тавсифида келтирилганидек, смартфон қоронғиликда ҳам деталларни қочирмасдан, аниқ-равшан суратга туширади, шунингдек, Dual Pixel технологияси тезкор автофокусни таъминлайди, натижада энг кескин ҳаракатларни ҳам кадрга муҳрлаш мумкин.

Аммо селфи олиш вақтида телефоннинг силлиқ ва узун корпуси яна ноқулайлик туғдириши мумкин. Интернет кенгликларини излаштириб, смартфондаги пульсометр ёрдамида селфи олиш имкониятининг борлигидан хабар топдик.

Маълум бўлишича, бу функция янги эмас — у биринчи бўлиб Galaxy Note 4’да қўлланилган. Пульсометр ёрдамида селфи олиш учун, дастлаб бу функцияни камера созламаларига кириб ёқиш керак бўлади (менюдаги «Суратга олиш усуллари» бандига киринг ва «Пульс датчигига тегиш»ни ёқинг).

Энди селфи олиш вақтида иккала қўлни ҳам банд қилиш ўрнига, телефонни тутиб турган қўл бармоғини орқа панелда камера ёнида жойлашган пульс датчигига теккизиш ва суратга тушириш мумкин.

Энг қимматбаҳо замонавий смартфон

Samsung Galaxy S8 ва S8 Plus смартфонлари савдоси 21 апрель куни бошланди. Сотилаётган бозордан келиб чиқиб, Samsung смартфонининг нархи кичик модель учун 720 доллар ёки 800 еврони, катта модель учун эса 840 доллар ёки 900 еврони ташкил қилади. GSM Arena нашри ташкил қилган сўровда иштирокчиларнинг 72 фоизи гаджетнинг нархини ҳаддан ташқари баланд деб топган бўлса-да, таҳлиллар смартфоннинг таннархи ҳам шунга яраша баланд эканлигини кўрсатди: Samsung Galaxy S8 таннарх нуқтаи назаридан энг қимматбаҳо замонавий смартфон деб эътироф этилди. Уни ишлаб чиқариш компанияга 307,5 долларга тушади. Бу Apple ўз iPhone 7 смартфонига сарфлайдиган маблағ (224,8 доллар)дан 35 фоизга кўп демакдир. Шу билан бирга, Samsung битта Galaxy S8’ни сотишдан тахминан 88,2 доллар даромад олади.

Samsung Galaxy S8 Ўзбекистонда ҳам сотувга чиқди. «Mobinfo.uz» нашри ёзишича, Тошкентдаги «Малика» савдо марказида смартфон ҳозирча рекорд даражадаги нархда — 6,5 миллион сўмга сотилмоқда. Таққослаш учун, айни пайтда ўтган йилги флагман — Galaxy S7 Edge’нинг нархи 4,6 миллион сўмни ташкил қилади. Galaxy S6 Edge эса 3,3 миллион сўмга сотилмоқда.

Samsung Galaxy S8 ҳақидаги баъзи фойдали маълумотлар

Экран пикселини ўзгартириш мумкин

Матрицанинг ўзи 1440×2960 пикселли, аммо меню орқали уни 2220×1080 ва ҳатто 1480×720 пикселли қилиш мумкин — дастурлар элементлари, графика ва бошқалар айнан шундай акс этади. Бу қувватни тежаш учун керак бўлади.

Snapdragon’ми Exynos?

Энергия жиҳатидан самарали Qualcomm Snapdragon 835 Galaxy S8’нинг Америка учун мослаштирилган версиясида бўлади, бизгача етиб келадиганлари Exynos 8895 чипида ишлайди.

Бармоқ изи сканери орқа панелда

Орқа панелдаги бармоқ изи сканери Samsung телефонларидан фойдаланиб келганлар учун ғалати туюлади. Устига-устак, сканер корпус ўртасида эмас, камера ёнида жойлашган.

Bixby овозли ёрдамчи

Овозли ёрдамчига катта эътибор қаратилди ва ҳатто чап ёндан алоҳида тугма ҳам ажратилди. У табиий тилни тушунади ва зарур бўлганида топшириқларни бўлиб-бўлиб бажаради, қайсидир нарсаларни аниқлаштириш учун қайта сўрайди. Аммо Bixby ҳозирча ўзбек тилига мослаштирилмаган.

Хулоса ўрнида

Экспертлар янги Samsung Galaxy S8 нафақат ташқи кўриниши, балки ички хусусиятлари ва функциялари билан аввалги моделлардан фарқлана олган ҳамда шуларнинг барчасини ихчамгина корпусига жамлай олган смартфон деб баҳоламоқда.

Galaxy S8’ни сотиб олиш борасида иккиланаётганларга айтишимиз мумкин бўлган ягона нарса шуки, таннарх жиҳатидан энг қимматбаҳо смартфонни сотиб олишга сизни ё нафосатга, ё функционалликка бўлган мойиллигингиз ундай олиши мумкин, шу икки жиҳатни баравар қидирганлар ҳам уларни айнан ушбу қурилмадан топади.