Suriya armiyasi va hukumatparast harbiy guruhlar askarlari BMT gumanitar konvoylaridan dori-darmonlar va bolalar ozuqalarini olib qo‘yib, ularni ortiqcha narx bilan qora bozorda sotmoqda. Bu haqda AQShning BMTdagi doimiy vakili Nikki Xeyli ma’lum qildi, deb yozadi “TASS”.
“Suriya hukumat kuchlari va hukumatparast ko‘ngilli askarlar bolalar ozuqalari, vaksinalar va akusherlik to‘plamlaridagi pinsetlarni musodara qilmoqda. Ular pediatrlik to‘plamlaridan antibiotiklar, ninalar va dokalarni, dializ uchun uskunalarni, oilaviy gigiyena to‘plamlarini va kuyishga qarshi yordam ko‘rsatish vositalarini olib qo‘ymoqda”, — dedi diplomat BMT Xavfsizlik kengashi majlisida.
Uning so‘zlariga ko‘ra, bu harakatlarni oqlab bo‘lmaydi, ammo ularni tushuntirish mumkin.
“Jazo berilmasligidan foydalanib, Suriya hukumat qo‘shinlari gumanitar yordam yetkazishga xalal bermoqda. Tibbiy vositalar baland narxlarda qora bozorlarda sotilmoqda yoki blokpostlarda pora evaziga berilmoqda”, — dedi Xeyli.
U hukumat qo‘shinlarini “Suriya xalqi azoblari va o‘limidan foydalanib boylik orttirish”da, Rossiyani esa ushbu harakatlarga to‘sqinlik qilmayotganlikda aybladi.
Izoh (0)